Porta lui pure il grembiule bianco, ed ha in capo un berretto a visiera. Sotto il braccio tiene un piccolo pacco. Entra serio, quasi accigliato) Oh eco, quela nova! El solito congresso dei "senza far gnente"! In mancanza de aventori, vegnì vualtri, no xe vero, a impenirme la botega? Corpo d'una siola vecia! Se no meto un per de carabinieri ale porte che fassa rispetar i mii ordini, vogio che i me meta in galera, mi, varè... (Alle due donne) Cossa voleu qua?
Nana. Mi gera vegnuda a ciamar la Pina...
Pina. E mi...
Zaneto. A ciamar Piero, no? muso da pantegana... O xelo lu che te ga ciamà ti?
Piero. Mi no ciamo mai nessun...
Zaneto. Za, ma co la vien, no ti la lassi più andar, no, sorzeto da rio? E, invece de lavorar, ti fa el piavolo co lore... (Dopo aver posato il pacco sopra un armadio, avvicinandoglisi) Varda, gnancora giustà quel taco, no ti ga, da stamatina... (Prendendo una forma di legno) Ostrega putela! Se no me dispiasesse de perderla, voria farte magnar sta forma a uso paneto!
