Piero. Eco, ch'el se la ciapa sempre co' mi, co quela colpa che ghe n'ò.
Nana. Ma sì, povaro toso, co so vegnuda qua el lavorava...
Pina. E... el ga sempre lavorà..
Nana. No gh'è proprio nessuna rason de strapassarlo...
Zaneto. Ma mi ve strapassarò anca vualtre e ve cassarò via a legnae se continuarè a vegnir qua a imboressarlo... (a Pina) Specialmente ti putela...
Pina. Oh! el xe mio moroso dopo tuto...
Zaneto. Sì, ma prima de tuto, invece, el xe el mio lavorante, e mi lo pago perchè el me serva mi e no perchè el la varda ela... Gala capio? E ela faria megio a tendar de su, al so coredo..
Nana. Ma se i ga da maridarse bisogna pur che i se veda, che i se conossa pulito...
Zaneto. Ma chè! Se tuti gavesse da conosserse pulito prima, dopo nessun se maridaria! E po': gala da esser questa la sala dele conossenze? Questa xe una botega, un logo sacro al lavoro e bisogna rispetarlo come una ciesa. Intendeu? Se no altro per un riguardo a quel Santo che xe là... (Volgendosi verso l'altarino
