sento ch'el vin xe bevanda — e a momenti el dà un supion e feliçe note...!
Piero. Epur, come santo, el dovaria aver pazienza...
Zaneto. Cossa? Gnente afato! Quando una roba no comoda, no ghe xe santi che tegna... (Sedendo al deschetto di fronte a Piero) Mi stamatina go manda uno a farse... far la rimonta a quel paese, perchè el diseva ben dei reoplani...
Piero. E a lu no i ghe va?
Zaneto. Ah! Ti vol che i me vada? Ma no ti capissi che i xe la nostra rovina?
Piero. Anca i nostri?
Zaneto. Tuti!
Piero. Mi no me par...
Zaneto. Ohe, tangaro, a cossa serveli i reoplani?
Piero. Ciò... a svolar...
Zaneto. Ben, e fin che se svola come se fa a consumar le scarpe?
Piero. Ah za!
Zaneto. Perchè no gera abastanza i vapori, i treni, i automobili, i velocipedi e compagnia bela, anca queli ghe voleva... E po' i dise ch'el mondo camina, ma mi me par che se fassa de tuto per no caminar altro!
