Piero. Per altro le xe bele invenzion...
Zaneto. Za: per mandarne al maloron pezo de quelo che semo! Ma no ti ga visto che, adesso, dopo aver inventà la machina per far le scarpe nove, i ga trova anca quela per giustar le scarpe vecie?
Piero. Si che la go vista.
Zaneto. Ben, e nela to anima de savatin, no ti te ga sentio assassinà? No ti ga visto nel'ingranagio de quela machina distruta la to profession? No te xe vegnuda la vogia de butarghe drento una bomba e de mandarla in tante sansarele?
Piero. Mi no veramente...
Zaneto. Eh za! E ti sarà stà invece a mirarla come un macaco, perchè vualtri, zovenoti d'ancuo, l'amor de l'arte no lo gavè e ve basta quelo de le cotole...
Piero. Oh, el vada là, che per i so tempi, le cotole gavarà piasso anca a lu.
Zaneto. Sior si, ma per le cotole no trascurava i stivai! E tirandoghe i oci a qualche mora continuava a tirar anca i spaghi...
Piero. E no li tiro anca mi tuto el giorno?...
Zaneto. Per forza, e co la paura de sporcarte le man.
