Pina. No sa, la gera una de quele smorfiose...
Zaneto. Tasi ti, che qua se trata de afari...
Pina. Eh! se ti savessi che afari...
Zaneto. Insoma tasi, go dito! (a Piero) E ti avanti, sentimo, cossa volevela sta signora...?
Piero. Che se ghe giustasse sta borseta; e po' la m'à dito che la ne ordinarà un per de stivaleti..
Pina. Sì, un per de corneti!
Nana. Ma, Pina, da brava, sta sita...
Zaneto. Ben, questo me fa piaçer. Vol dir che la nostra Dita no xe gnancora desmentegada e che...
Pina. Ma te giuro, papà, che quela gera una çerta petegola...
Zaneto. Una petegola ti xe ti, e varda che no permeto che ti me ofendi i clienti... Anzi, per castigo, ti farà ti el piacer de giustarla la borseta, e subito, che quelo xe un lavoro da done...
Pina. Cossa mi? Ah, mi no so bona...
Zaneto. No ti xe bona?
Pina. No, e dopo go tanto da lavorar dessuso per... conto mio...
Zaneto. Per el to coredo forse? Ben, senti: se no ti te meti subito drio a quela borseta,
