Quanti scherzi fa el tempo e che matae!
Che incostanti zornade e capriciose:
A l’alba da un sol belo iluminae
E più tardi, vardè, scure e piovose! -
Su da le siese ancora despogiae,
Su da le strade bianche e polverose,
Eco i soli de marzo e le ventae
Fredissime cussì, cussì noiose! -
Creature, aveu la tosse? Restè a letto:
Sta ariazza matussela xe la morte,
Sto mese xe el più strambo e malandreto!
A casa! a casa! e ben tapadi drento -
Donine mie, se avè le gambe storte,
Donine mie, no cimenteve al vento! -
