(In Venezia)
Bele note d’Agosto! Una barcheta
Sbrissa via, senza ciasso, ne i canali
Più sconti, verdi, streti... La mareta
Fa dei zoghi de luse coi ferali,
L’acqua carezze, e basi ga l'arieta:
E da la teraferma ad intervali
Vien d'amor una dolce canzoneta
Vien ’na gran pase da le quiete cali...
Soto un balcon la barca s’è fermada,
Senza rumor... Un'anema no passa...
La bona luna ha indormenzà la strada...
Xe l’ora dei morosi. Varda!... Ascolta!
Una dona, che ama, la se sbassa,
E la dixe de no, l’ultima volta! -
