(In vilegiatura)
Drento un carozon a doradure,
Vegneva, da Venezia, i nostri noni,
Seguidi da una coa de cargadure,
Dai più eleganti e alegri peruconi.
Tra i albari, le dame, più sicure
Se dava ad amoreti, a bali e soni:
Nasceva le più celebre aventure,
Fioriva la comedia de Goldoni.
Drento un vagon, ancuò, de terza classe,
Vien i nevodi a far economia,
A tirar zo ’na barca de lamenti,
Lagnandose, col prete, de le tasse...
Del setecento, credo no ghe sia
Che i soliti scroconi e maldicenti! -
