Pasqua granda
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Epicedion | Edission e fonte ▼ | Ciacole d'ocasion → |
.jpg)
Ego sum Pastor bonus et cognosco oves meas.
Ioan. X, 24.
ZÀ che Gesù torna volando ai cieli
Perchè xe Pasqua de Resurezion,
Racolgemose in Dio, cari fradeli,
E femo un poco de meditazion,
Considerando el numaro de agneli
Che ancùo se magna sta popolazion,
Che spanzàe de fugazze e de torteli
E che sbornie ciapàe per divozion.
Varè sti preti! Ghe ne xe de queli,
Povareti, che solo a colazion
I se slapa do chili de graneli
E dopo i ofre a Dio l'indigestion,
Ronfando a panza in su co fa i porceli...
Che bela cossa xe la religion!
L'agnelo? Cari lori, questo el xe
Un simbolo inventà dal Creator,
Anzi un dogma che insegna come che
La chiesa la xe un grege e mi el Pastor.
Co' infati el bizarin se leva in piè,
Mi ghe soprimo el gusto de l'amor,
Ghe dago el late apena el fa be-be
E l'ingrasso e lo còcolo sul cuor.
Mi son quel bon Pastor che se l'agnelo
Se perde, caso mai, per la montagna,
Lo zèrca in automobile e in batèlo
E co lo gà trovà, se lo compagna
In brazzo a casa, come un bon fradelo,
E lo pela, lo scortega e lo magna.
E a cena cossa mai gàlo disposto,
Come galo parlà Dominedio?
«Putei, la carne mia xe 'l vin de l'osto
E sto pan che magnè xe 'l sangue mio!»
E i Apostoli alora i gà resposto:
«Se 'l vin xe bon, se 'l pan xe ben spanio,
«Viva la Pasqua, l'umido, e anca el rosto
«E malegnazo chi se tira indrìo!».
Vedèu donca l'esempio del Vangelo?
Femo tesoro de sto insegnamento
Se volemo salvarse e andar in cielo.
Magnè, che una magnada in sto momento,
Co' ghè i vovi, le fritole e l'agnelo,
La xe squasi un otavo sacramento!
.jpg)