Pensieri
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← Il Conclave nero | Edission e fonte ▼ | Il bagno → |
![](http://upload.wikimedia.org/wikipedia/commons/thumb/8/81/Le_Ci%C3%A0cole_de_Bepi%2C_Roma_1908_%28page_121_crop%29.jpg/400px-Le_Ci%C3%A0cole_de_Bepi%2C_Roma_1908_%28page_121_crop%29.jpg)
Le maitre, au contraire, était obsédé de graves pensées.
Renan, Vie de Jesus, XXII.
MI, quando penso de sti ebrei polachi
Castrà in piaza e scanà, come i porceli,
Digo drento de mi: semo fradeli,
O semo bestie pezo dei macachi?
Cossa diria la zente se i cosachi
Vegnisse, putacaso, in Araceli
E castrasse in presenza dei fedeli
El cardinal Tripepi arente a Machi?
Tuti quei che gà sangue in te le vene
Protestaria concordi in fazza a Dio,
Tuti! Persina l'Empio che detiene.
Perchè solo per lori? A parer mio,
Quanto a le scarabàtole terene,
Xe un omo un cardinal come un zudio.
Digo un esempio che me vien in mente.
Quando gh'è stà, purtroppo, el teramoto,
In mezo a tante povare inocente
Quante... putele mai xe andà de soto!
E ben? Se Dio le trata istessamente,
Toca a nualtri a farghe el polizioto
E dir, questa val poco e quela gnente.
Questo xe un vaso san, quelo xe roto?
La carità nei zorni del flazelo
No discute, no pesa, no sdotora,
Ma dà socorso a tuti, anca al fradelo!
Vardeme a mi! Senza pensarghe sora,
Senza dir, déli a questo o déli a quelo,
Gò manda i bezi... che i me dol ancora.
Ma, tornando ai Ebrei, gavémo visto
Come in tanti paesi de Polonia
I se scorda el Vangel che testimonia
Come fusse zudio l'istesso Cristo.
Altro che zente e popolo malvisto!
Altro che schiavitù de Babilonia!
I me li castra senza zerimonia
Col genio e l'energia de Papa Sisto!
Si: capisso anca mi l'antipatia
Che ghe porta qualcun, soto pretesto
De un fià de carne che i ghe tagia via.
Si: ghe ne manca un toco, ma per questo,
Salva la fede, no me par che sia
Giustizia giusta de tagiarghe el resto!