Per celebre artista
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← La versomania | Edission e fonte ▼ | A un esimio capocomico → |
PER CELEBRE ARTISTA
(CAMILLO SIVORI)
Quel picenin che monta sul scagneto
Per sonar la Sonambula e 'l Mosè,
No xelo un mago, un spirito foleto,
No xelo forse dei violini el re?
Lu ve porta a le stele col so archeto,
Sora una corda sola el fa per tre;
Ma co ’l spiega el so genio in un quarteto,
Squasi squasi a i miracoli credè.
Per lu sospende 'l canto i canarini,
E i gran maestri che l’ascolta in cielo,
Vardandose un co l'altro i slonga el naso.
Ombra imortal del vecio Paganini,
Ciàpelo fra i to brazzi sto putelo,
Meteghe su l’aloro e daghe un baso!