Per chiusa de un garanghelo in campagna

by anonimo

3 III. Per chiusa de un garanghelo in campagna Marco e Tòdaro II. El carneval de Venezia IV. Filantropia! anonimo 1886 XIX

poesie

Anonimo ―  Marco e Tòdaro

III. Per chiusa de un garanghelo in campagna

1886

Edission original:	Anonimo, Marco e Tòdaro, versi in vernacolo venezian de un mestro de Canaregio, Venezia, tipografia antica ditta Cordela, 1886
Fonte:	Indice:Marco e Tòdaro.djvu

←  II. El carneval de Venezia

Edission e fonte ▼

IV. Filantropia!  →

III.

PER CHIUSA DE UN GARANGHÉLO¹
DE VILEGIANTI IN CAMPAGNA

Dame e lustrissimi!..
Se le permete,
Vorave dirghe
4Do parolete.

Se anca son picolo,
Nè go l'età
De tanti Nestori
8Che ghe xe quà,

L'è un scherzo semplice
De la natura,
Che no se imbrogia
12Co la figura.

El xe anca el pèvare²
Un gran da gnente;
Ma se el se mastega,
16Chi no lo sente?

Za, le se imagina
Quel che ò da dir:
Saludar tuti,
20E po finir.

Prima ringrazio,
(Che za se sa,)
I ecelentissimi
24Che n'à invidà:

E po i cantanti
E i sonadori,
Che tanto spasso
28Ga dà a sti siori;

E po fra i altri
Vegnindo al fin,
Quela gran machia³
32De Ragusin:

E po in un muchio,
Perchè i xe tanti,
Tuta la fragia⁴
36Dei vilegianti:

E po saludo,
Per civiltà,
Tuti i foresti
40Che n'à grazià.

Ma al vechio Anchise,
In ponta al naso
Me sento un rèfolo
44De darghe un baso;

Pregando el cielo
Proprio de cuor,
Che el ghe moltiplica
48Sto bon umor;

E che el ghe manda
Fra i so matezzi
Vita, giudizio,
52Salute e bezzi;

E che un altr'ano
Co sta alegrìa
Possa revedarse
56La compagnia.

---

Note a cura de l'autor

1. garanghèlo — desinare di amichevole brigata.
2. pèvare — pepe.
3. machia — tomo, bell'umore, originale ecc.
4. fragia — brigata sollazzevole, o di stravizzo; compagnia di buontemponi. Storicamente poi, è corporazione d'arte o mestiere: dal basso latino fratàlea, fratria, fraterna.