Per nozze Ernesto Chiarion-Casoni e co. Emma Baglioni
|
1894
|
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Per Nozze | Edission e fonte ▼ | La Comission per la nova lege su la laguna → |
Dunque no ghe più dubio,
Alfin l'è capitada
Sta ora benedeta
E tanto sospirada.
Vedesto ò dai periodici
Do nomi accompagnai
Ò dito è l'ultimatum
Dei nostri inamorai.
Difati al primo vedarse
Co' Ernesto in quela sera
Digo mi a lu solecito:
Adunque la xe vera?
Ò visto al Municipio
Le toe publicazion.....
Quando la fastu dimelo
O toco de baron?...
A rianimarse, tuto
Lo vedo e la parola
Scata sicome eletrico
E rapido l'intola:
Bogier me sento el sangue,
Go un'ansia dentro el cor,
Me par sentir perfin
La vose del mio amor.
Presto, sì caro Nane,
Ai primi del venturo,
E ben o mal intanto,
Cerco de tegnir duro.
La cerimonia ut ritus
De nostra religion
Vien fata a Cervignan
Logo de mia elezion,
Compida che la sia
El solito rinfresco,
Po' oltrepassà el confin
Ritorno ancora fresco.
Al nostro bel paese
Italia benedeta
Dove dei mi sospiri
Ariverò a la meta.
E qua finio el discorso,
Bevendo alegramente
Parlava mi co lu
De cosa indiferente,
Quando el me dixe enfatico
Ciapandome le man:
Ricordite che vogio
Do versi in Venezian....
I ghe sarà sicuro,
Saradi a zighignola,
Perchè la vena scorer
No possa da se sola.
Eco che adunque in opera
Mette del so saver
La macia del to amigo
Zaneto l'insegner.
Za che ti te maridi
Voi darte come a tanti,
Ricordi che in sti lidi
No xe po' esuberanti.
Intanto nel pasagio
A l'italo confn
Provedite, mio caro,
Fornido el borselin.
Perchè de nozze el viagio
No ciama economie,
La borsa la va averta,
Ghe fusse le scarpie.
No ghe più contrabando
Xe libero el pensier,
Pol tor la sua Ema in brazzo
Ernesto finanzier,
Che za pagà xe el dazio
Co' bola de cauzion,
E per la via de transito
Se trova el belo el bon.
La copia inamorada
Circolazion d'uscita
Lassa passar contenta
Dela novela vita,
Chi intorno vien parlandoghe
De sto compagnamento
Co' essa consolandose
Co' cuor assae contento.
Conosce za i so oblighi
Restituzion diriti
Co' ingiostro incancelabile
A Cervignan ga scriti.
No più dichiarazion
Visita preventiva,
Soltanto esportazion
De un'anema giuliva,
Che a dirla in confidenza,
Deventa no manco,
Tocà no ga un istante
D'Ernesto el punto franco.
A Cervignan lo svincolo
S' à fato in piena regola
No' s'à defraudà l'Erario
Nemanco d'una fregola.
De certe oculte visite
D'epoca temporaria
Ernesto ga giurà
Mandarle tute in aria.
Ghe basta l'alcolometro
Insieme del forino
E la sancida lege
Del classico provino.
Nessuna controversia,
Ne ombra pur de velo,
Apronta xe la bote,
Averto xe el spinelo.
Messo xe al posto solito
Robusto cavaleto,
Ghe posa la stadera
Nel natural so' leto,
Co brazzo alquanto longo
Ma sempre de misura,
Libera xe l'entrata
Quantunque un poco scura.
Insoma tuto è in ordene
No ocore la finanza,
Ve' posso dir magnifica
L'à parecia una stanza,
Nel vecio domicilio
In cale a San Cassan
In mezo a una famegia
Che 'l cuor gà sempre in man.
Adunque a monte i scherzi,
O sposi inanzolai,
Scusè se ben o mal
Sti versi go molai.
Credeme che sò in regola
Perfin co' la boleta
E la parola dazio
No paga co' xe schieta,
Finio go cari sposi
Le ciacole mie tute,
Felicità ve auguro,
Richeza de salute.
Venezia, drento de l'ano.