Per nozze Porcia-d'Altan
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← El pentimento de la Madalena | Edission e fonte ▼ | Avvertenza → |
.jpg)
L'occasion del matrimonio
Xe la fiera dei poeti;
Ghe vol sempre tra i confeti
Una risma de rondò.
Tuti canta, ma le arie
Pofarsbrio, xe tanto vechie
Da secar prima le rechie
E po dopo assae più in zo.
Ogni volta semo a quela,
Ghe vol versì a tuto costo,
E la voga de sto rosto
No ga più da terminar.
Sempre 'l talamo fecondo
Sempre 'l santo nodo in balo,
E Imeneo po senza falo,
E la fiaccola e l'altar.
E la Fede che i do sposi
Basa in fronte strenze al pèto
E la Pace che un rameto
Del so olivo ghe dà in man.
Ogni volta i casti amplessi
Col Pudor messo in berlina,
E la pronuba Lucina
Necessaria come 'l pan.
E po i fasti dei bisnoni
Col so pien s'anca i xe vodi,
E i presagi su i nevodi
Che in credenza se pol tor.
Tutte cosse co la barba
Tanto bele che le stufa,
Tutte cosse co la muffa
Che ga perso el so saor.
Mi no vogio. Sposi cari,
Dir da novo ste vechiae,
Ma ch'el vala poco o assae
Un recordo ve voi dar.
Xe felice 'l matrimonio
E xe i sposi fortunai,
Quando i sia da maridai.
Quel che i xe da maridar.
El moroso no ga in mente
Che 'l so amor e la so bela,
El xe sempre drio de ela
A le cotole tacà.
El xe atento, premuroso,
El xe tuto compiacenza,
El se adata, el ga pazienza
El xe tuto gran bontà.
El mario da là tre mesi,
L'è svogià, l'è trascurato,
El scomenza a far el mato,
No l'è più tuto mugier.
El ghe fa tanto de muso,
El ghe rugna, el la strapazza,
El ghe nega povarazza,
Sin le cosse del dover.
La morosa vede solo
Per i ochi del so caro,
No la buta un fià d'amaro
La ga in boca sempre 'l miel.
La xe docile, ubidiente,
La sta cota, la sta crua,
La xe un anzolo, una pua,
Se pol dir no la ga fiel.
Fata sposa la diventa
Stravagante dispetosa:
Paradiso da morosa,
Purgatorio da muger.
Ogni dì la ga un caprizio,
La comanda, la pretende,
Qua la spande, là la spende
E scantina al so dover.
Cari Sposi, siè morosi,
Che cussì fassendo pata
La muger sarà beata
Senza el peso del dover;
E 'l mario pago e contento
Nol dirà gnanca da posta:
Signor, deme la mia costa,
E toleve la muger.
.jpg)