Perchè sò ve sarà d'aggradimento
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo I, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 1.djvu |
| ← El negoziar el xe un gran bel mestier | Edission e fonte ▼ | Me lambico el cervello zorno, e notte → |
Perchè sò ve sarà d'aggradimento
Saver d'un vostro amigo la fortuna,
3Ve dago parte del mio avvanzamento.
M'hà manda l'altro zorno in sulla bruna
A chiamar una Vedoa d'un Mercante,
6Che del negozio no vuol star dezuna,
Se mi voleva unir al so contante
Anca el mio capital con patto espresso
9De tiorlo in drìo co voggio in t'un istante;
Ch'ella in riscontro me metteva appresso
La so bottega, e la chiave addosso
12Per avrirla, e serrarla a un tempo istesso:
Che l'avesse da usar più, che mai posso
In ogni sò richiesta, e manizarse
15Tutti, finche'l negozio vegna grosso,
Che no s'abbia gnessun mai da lagnarse,
Ma reciproca fusse la fadiga,
18E goda più quel, che sà più inzegnarse.
In te la so bottega, sta mia amiga,
Sò, che la gà de bon, e mi per questo
21La servo in tutto, basta la mel diga.
Ghe xe un da dir, che me xe assae molesto;
Perchè tegnir la chiave anca vorrìa
24D'un armaretto fatto con bon sesto.
La lo tien nella porta da drìo vìa,
E drento mì son certo persuaso,
27Che la gabbia la meggio mercanzìa,
Mi gò sospetto, che là drento un vaso
Ghe sia pien d'oro, e un balsamo prezioso;
30Che no la vuol, che mi ghe metta el naso;
V'assicuro, che son assae curioso
De saver quel negozio, e no capisso,
33Perchè in questo la gà del misterioso
Tanto, e tanto però molto gradisso
Quejlo, che la me fà, e ben chiamar
36Me posso fortunà, co no falisso;
Ve digo ben, che mi del negoziar
Mai tanto le regole hò imparà,
39Quanto, che co sta Donna a praticar.
Del vero trafficar la m'hà insegnà
El modo, che bisogna i primi zorni
42Far boni patti, ma con civiltà;
Ghe vuol, perchè 'l contratto no se storni,
Co 'l negozio và ben tirar avanti,
45Se anca un corrispondente ve fà i corni.
Xe utile conoscer dei Mercanti
La so Natura, se i xe tardi, o presti,
48E no bisogna vegnir zoso avanti;
A conchiuder insieme esser ben lesti,
Contrattar alla muta no và ben,
51Ma gnanca colle ciarle esser molesti.
Fatti, e poche parole far convien;
E xe utile assae saver valerse
54Delle so man, e della lengua ben.
In t'un negozio solo contenerse
No xe da bon Mercante, e quando preme
57Bisogna d'altri capi anca valerse;
S'hà da bandir per negoziar insieme
I scrupoli, che questi un dì ve puol
60Farve fallir in sù'l più bel, credeme,
Qualche volta del spasso se se tiol
Coll'imbriagar el so compagno ancora,
63E pò'l se zira, come, che se vuol.
In summa a negoziar se se innamora,
Credelo, in sta maniera, e v'assicuro,
66Che 'l capital i frutti butta fuora;
Ve dirò, che bisogna tegnir duro,
E no molar la robba cussì presto,
69Come chi del negozio vive a scuro;
V'avviso pò, che la m'hà dà anca 'l resto,
Perchè un di la m'hà visto in gran pensier,
72Che giera per andar tutto in prottesto.
Quel vaso la m'hà dà, che in tel armer
Ella s'aveva sconto, come hò dito,
75E allora hò tornà a far el mio mestier.
De negoziar m'hò messo più in petito,
E in tempo, che mi fava poco, o gnente;
78Xe andà avanti el negozio assae pulito;
M'hò messo a star in casa allegramente,
E se mi negoziava per Levante,
81Adesso anca negozio per Ponente.
La mia compagna xe fida, e costante,
E perchè'l mio negozio vada ben,
84La m'hà dà le so zogie tutte quante;
E quà finisso, e v'auguro ogni ben.