Poesie veneziane del conte Francesco Cestari/Alla marchesa Teresa Archetti Cauzzi. Canzone
|
1819
|
|
Edission original: |
Francesco Cestari, Poesie veneziane del conte Francesco Cestari, dedicate alla nobile donna la signora marchesa Teresa Archetti Cauzzi, Venezia, Alvisopoli, 1819 |
|
Fonte: |
| ← Per compleannos della contessina Paolina Sugana. Anacreontica | Edission e fonte ▼ | No se pol dar efeti → |
O cuor imparegiabile!
Donca per la Mariani 1,
Zermana, el vostro metodo
Dopo de disdot'ani 2
Cambiar gavè podesto per sentirla,
E da casa portarve a incoragirla?
Me par za adesso vederve
In mezo a tanta zente,
Che tuta in beatitudine
No sta badando gnente
A farse dai cavali zapegar,
Pur de poderve un atomo vardar.
Per Vu mi vado in estasi
Pensando co se' entrada
In quel Teatro a l'Opera,
Nel qual, come se' stada
Fussi mugier d'un Re, da tuti i petti
Sortir gavè sentío viva l'Archetti.
E la Morandi 3 estatica
Restando in quel momento,
No ga fenío un gorghegio,
Sospesa dal contento
Che tuto quel Teatro ga provà,
E che in frequenti eviva v'à mostrà.
Se tuto quanto un popolo
Podè, Zermana mia,
Far deventar fanatico;
La vostra compagnía
Pensève quanto mai Nu 4 sospiremo,
Nu, che d'apartenerve se vantemo.
Me fazzo, sì, l'interprete
Dei voti d'un Nevodo:
De quei de do Famegie 5,
Che d'amicizia el nodo,
Più de quelo del sangue, unite tien,
E che reclama co sti versi un ben 6.
Un ben, che più in arbitrio,
De Vu no xe 'l negarlo;
Un ben, che Vu prometerlo
Gavè podesto, e farlo
Ne la stagion passada ne disevi,
E replicatamente lusinghevi.
Ma un spirito profetico
St'anima tuta invade:
Le vostre tante cause7
Za vedo terminade.
Sì, Marchesa, no temo adesso più
Che presto no v'abiemo alfin tra Nu.
- Note
- ↑ [p. 31]Giovane dilettante di canto, accademica filarmonica di Cremona, raccomandata alla Marchesa Teresa Archetti Cauzzi nella circostanza che si espose per la prima volta sulle scene di quel Teatro.
- ↑ [p. 31]Nella serata dell'enunziata giovane si portò la Marchesa al Teatro dopo diciott'anni che non sortiva di casa.
- ↑ [p. 31]Compagna di canto della Mariani.
- ↑ [p. 31]L'Autore allude al sig. co. Domenico Manzoni Nipote della Marchesa, ed a se stesso.
- ↑ [p. 32]la Famiglia del nominato Manzoni e quella dell'Autore.
- ↑ [p. 32]Promise la Marchesa alle enunciate due Famiglie di recarsi nel loro seno per qualche tratto di tempo.
- ↑ [p. 32]La Marchesa è da molti anni addietro involta in varie cause di grave importanza.