Quà dove l'Adese

by Berto Barbarani

3 Quà, dove l'Adese I due canzonieri I due canzonieri/Libro V - Le adesine El campanar de Avesa I canarini Berto Barbarani 1911 XX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro V - Le adesine

Quà, dove l'Adese

1911

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  El campanar de Avesa

Edission e fonte ▼

I canarini  →

Quà, dove l'Adese, sensa fermarse
rompe nei ponti la so canson,
stao¹ atento ai versi che pol negarse,
li tiro a riva, col me baston...

Li tegno al suto,² li meto al caldo
parchè i renvegna,³ che i ciapa fià,⁴
li mando a spasso sul Montebaldo
che li fa degni de sta çità.

Quando jè svelti, libari e pronti,
ridoti a l'uso de la rason,
mi che me godo guardar dai ponti,
rompo ne l’Adese la me canson...

Canto i molini, canto le ciese,
co la me solita sincerità,
canto le done del me paese
de un bel simpatico che no se sa...

Se la me vita de tuti i giorni
la va via ciara, canto così:
se la fortuna la me fa i corni,
màstego amaro par tuto un dì;

me scondo drento de 'na ostària,
nego la rabia drento nel vin...
Torna l'alegra malinconia,
caval del mato del me destin!

Questi versi, che servono di prefazione al libro V. (I. del II. Canzoniere), furono scritti per le nozze di Francesco Apollonio e Gina Veronesi in Verona.

---

Note

1. stao: sto
2. al suto: all'asciutto
3. i renvegna: rinvengano
4. i ciapa fià: prendano forza.