Quel che par senza cassa un orinal

by Maffio Venier

3 Quel che par senza cassa un orinal (Sonetto LXII) Canzoni e sonetti Sonetto LXI. Haver un par(e) che non crepa mai Sonetto LXIII. Certi cavei rizzoti inanelai Maffio Venier XVI Soneti Altra edizion: Il ritorno d'un Amico (1817)

Maffio Venier ―  Canzoni e sonetti

Quel che par senza cassa un orinal (Sonetto LXII)

XVI secolo

Edission original:	Maffio Venier. Canzoni e sonetti. A cura di Attilio Carminati, Manlio Cortelazzo, Tiziana Agostini Nordio Venezia, Corbo e Fiore, 1993
Fonte:	http://www.bibliotecaitaliana.it/testo/bibit001236

←  Sonetto LXI. Haver un par(e) che non crepa mai

Edission e fonte ▼

Sonetto LXIII. Certi cavei rizzoti inanelai  →

Altra edizion: Il ritorno d'un Amico (1817)

Quel che par senza cassa un orinal,
E macaroni senza onto sotil,
E tola parecchià, senza un mantil,
E senza barbachieppi un carneval;

Quel che par senza piuma un cavazzal,
E senza fiori e herbete e Mazo e Avril,
Quel che par senza mànego un bail,
E salata senz'ògio e senza sal;

Quel che par senza letere un dotor,
Calze senza braghesse, o senza haver
Buso dove se caga un cagaor;

Quel che par senza scarpe un calegher,
Senza la so stagiera un pesador,
Senza porco, o lugànega, un triper,

Son parso mi, o Corner,
Sti dì che son sta fuora senza vu,
Mo sia ringrazià Dio che son vegnù.