Sò, che assae ti disaprovi
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo I, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 1.djvu |
| ← Non occorre stupirse, caro amigo | Edission e fonte ▼ | Giera un dì in una calle, che pissava → |
Sò, che assae ti disaprovi,
Che in amor no son costante,
Che me piase i musi niovi,
4Che vorrìa più d'un amante.
Ti xe molto semplicetta,
No t'intendi 'l nostro cuor,
Chi no xe più zovenetta,
8Quella sì conserva amor,
Ma chi gà la zoventù,
Che sù i Omeni gà impero,
Che li mette in servitù,
12No mantien amor sincero;
Un guerrier, che puol chiappar
Più Città, che lo consola,
Nol se puol mai ben quietar,
16Se'l ghe n'hà chiappà una sola.
Una Donna mi no stimo
Per bellezza, e nobiltà;
Mi ghe dago a quella el primo,
20Che gà amanti in quantita.
Un amante, e sempre quello,
Xe una cosa, che m'attedia,
Da principio tutto è bello,
24Ma poi stuffa ogni comedia.
Xe virtù amar un solo,
Ma un'incomoda virtù;
Mi con quelle me consolo,
28Che di amanti ghe n'hà più.
Ai Romanzi mi ghe lasso
Quella rara fedeltà,
Che l'hà scritta Ariosto, e 'l Tasso,
32Ma che mai no la s'hà dà.
Perchè i staga con speranza,
Co se puol in fazza ai Omeni,
Farghe lode alla costanza,
36Ma col cuor, che la s'abbomeni.
Quel, che insegna la natura,
E ch'insegna ancora l'arte,
S'hà da far con la misura
40Dar a tutti la so parte.
Tutti s'hà da coltivar,
Perchè tutti gà 'l so bon;
Quel pò s'hà da disprezzar,
44Che vuol farla da paron.
Tutti gabbia la so oretta,
E, co tutti insieme i xè,
A un de man darghe 'na stretta,
48A un zapparghe sù d'un piè.
Che alle grazie ognun se creda
D'esser solo el prediletto,
Che no è pò, che 'l se veda
52Da un rival sbalzà dal letto;
Che l'amor s'intiepidisse,
Co no gà rivalità,
Che i rivali lo nodrisse,
56E cussì più saldi i stà;
Che se mai qualcun ne trova
In error, s'hà da mentir,
E se'l cria, quest'è una prova,
60Che l'amor se fà sentir.
No tememo mai per questo,
Co'l se sfoga, che'l ne lassa,
Ma speremo, che ben presto
64El cervel ghe torna in cassa;
E che lù spontaneamente
El se butta in zenocchion,
E che'l pianza veramente
68Domandandone perdon.
Quanti vien per far l'amor,
Mai gnessun s'hà da sprezzar,
Che cussì no s'hà timor
72Un dì sole de restar;
Sarà ben, che ghe sia in lista
Frà sti amanti dei Poeti,
Ch'i me metta al Mondo in vista
76Coi so celebri Sonetti;
Colla svelta so maniera
Dei so scherzi favolosi
I ne crescerà la schiera
80Dei amici, e dei morosi.
Ouesto xe un gustar la rosa
Senza mai toccar le spine,
E schivar d'una tediosa
84Brutta vita le rovine.