Samarco (Attilio Sarfatti)
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← XXIV. L'estrazion del loto in piazzeta | Edission e fonte ▼ | XXVI. El putelo amalà → |
SAMARCO
(A CAMILLO BOITO)
1
El mio Samarco l'è 'na maravegia
De luse, de colori e de armonìa,
L'è de splendori 'na superba regia,
Più che lo vardo e più lo vardarìa.
No gh'e a sto mondo che un Samarco solo,
Più lo stago a vardar, più me consolo.
No ghe n'è de compagni gnanca in çielo,
Più che lo vardo e più el deventa belo.
'Na selva de colone e de figure,
Un arco sora l'altro, 'na gran festa
De colori, che fa pèrdar la testa,
Tinte palide e sguarde, ciare e scure.
Cupole bisantine e campanili,
E tuti in armonia diversi stili.
Marmi fati co l'ago e co 'l fuselo,
Eco el Samarco che ne invidia el çielo.
Eco el mio bel Samarco, el logo santo,
Gloria de sta çità tesoro e amor.
Più che lo vardo e più el me par'n'incanto,
Più che lo vardo e più me bate el cuor.
Co 'l sol ghe piove el so bel ragio biondo,
Par che se mova i santi dal so fondo,
Par che tuto abia vita e sentimento,
Co ghe piove la luna el quieto arzento.