San Marco
|
Edission original: |
Maria Pezzè Pascolato, Versi Veneziani, Milano, 1928 |
|
Fonte: |
| ← Adesso e dopo | Edission e fonte ▼ | La pase → |
.jpg)
A vedarte cussì desparechià,
Pien de sachi, coi santi intabarai,
Chi xe che no se sente el cuor strucà?
Ma cossa importa? ti xe belo istesso,
Tropo belo, San Marco, anca cussì;
E co piove le bombe, te confesso
Che se tremo no tremo che per ti.
E prego — come tuti qua se prega:
Vada pur la mia casa e quel che go,
Vada la barca, vada la botega....
Ah, ma San Marco, ma San Marco no!
No ghe xe remission per i pecai
Dei barbari che ofende sta cità;
Ma se San Marco i ne tocasse, guai!
El libro del Vangelo xe serà 2.
El «Pax tibi» mai più, no, no i lo vede:
Ghe xe sora la zata del Leon,
Antico segno de la nostra fede,
Segno sicuro che se ga razon.
E co se ga razon se bate duro,
E co se ga razon no se ga pressa.
Xeli mo lori quei de «indrio ti e muro»?3
E Venezia xe sempre quela istessa.
Più belo ancora del San Marco d’oro,
E più grando, più grando del so mar,
Venezia ga l’antico so decoro
E la lo savarà sempre salvar.
Che i svola, si, che i svola in so malora,
Che i buta zo... Dopo i se calarà!
Quanta sodisfazion gali finora?
No i ga visto che gnente no i ne fa?
L’altra volta Venezia gera sola
Contro tuti a resister e a patir,
Ma ancuo che i tre colori la consola
Fin el martirio la pol benedir!
12 Settembre 1916.
.jpg)
- Note