Sempre interviste
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Rerum novarum | Edission e fonte ▼ | Buffalo Bill → |
.jpg)
Nolite tangere christos meos et in prophetis meis nolite malignari.
Psal. CIV, 15.
COME? El fa el pampalugo e po' el me peta
Su la schena sto toco d'intervista?
Ma salo, caro lu, ch'el giornalista
La xe una professione massa indiscreta?
El vien, el vol savèr da l'a a la zeta
Se me piase el cognàc legitimista,
Se sudo, se son stà seminarista....
Falo gnanca la spia, falo, ostregheta?
Ma sior sì, paron caro, che son sta
Seminarista, con so permission.
Xelo contento adesso ch'el lo sa?
Come? Quel che fasevimo? Paron,
El confessor santissimo xe un frà,
E s'el cambia discorso el fa benon.
Ma sicuro, zogàvimo, se sa,
Co giera tempo de recreazion,
Ai zoghi competenti a quel'età
Che a l'omo se ghè averze la rason.
Pecà? Ma chi ghe parla de pecà?
Sicuro ch'el demonio el xe un baron,
E no ghè nego che in quel tempo là
Anca mi son sta indoto in tentazion.
Gò abùo anca mi l'idea sindacalista
De menar la biondina in gondoleta,
Che ancùo ghè pochi preti che resista;
Ma mi no gò badà una maledeta,
E gò mortificà la carna trista
Col seno e co la man, dise el poeta.
E adesso? Caro lu, co' la gò vista,
Sta primavera santa e benedeta,
Ne la memoria gò passà in revista
Tuta una zoventù d'anacoreta,
E gò capio che la pietà egoista
La xe un'infamità che crìa vendeta
E che invece l'amor scalda e conquista
Fina Dio che lo gusta e che l'aceta.
Oh, se podesse dar ste vanità
De complimenti e de genuflession
Per un'ora d'amor e de bontà!
Se podesse scampar da sta presòn,
Goderme el sol de tuti in libertà....
Ma zito! I vien..!.. Ciò, svelti, in zenocion!!
.jpg)