Sestine in lode dei cani
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
DI
MARCO SPRANZI.
1No comprendo perchè se chiami can
L'omo che nutre un cuor fiero e cativo,
Come el can fusse barbaro e inuman,
E per proprio caratere nocivo;
E trovo a parer mio assolutamente
Sto epitetar ingiusto e inconveniente.
2Sta bestia infati no la ze fornia
De mile virtuose qualità?
E co più de rason no la saria
Ne la imensa caena colocà
Tra l'omo e i bruti, no per la strutura,
Ma per la squasi umana so natura?
3Quanti servizi a l'omo no la presta
Coi so scherzeti, e col so alegro umor?
Col far ai so paroni aceto e festa
La se ghe insinua dolcemente in cuor,
Servindoghe de amena distrazion
In mezzo a le disgrazie, e a le aflizion.
4E quei vaghi e graziosi cagnoleti,
Delizia a le gentili signorine,
Sofegai de bomboni e de baseti,
No i merita le grazie e le moine
In confronto e a dispeto anca de tanti
Insipidi romantici galanti?
5Oh quanto al cazzador un can no zelo
De piacer, de solevo e utilità!
I pesi el ghe minora, e dreto e snelo,
Fa che ghe sia la preda agevolà,
E più che al cazzador al can ze spesso
Merito d'una cazza el bon sucesso.
6E in forza del squisito so odorato
A cercar le tartufole el ne giova,
E co indefesso usmar e delicato
L'indica a l'omo dove le se trova,
Procurando del ghioto a l'apetito
Un picante piatelo e favorito.
7La utilità del can ze più preziosa
Al grege de servir da difensor
Su sto so bulo vigile riposa
Nel so cuzzo butà quieto el pastor,
E el lovo impunemente no assalisce
El grege dove el can lo garantisce.
8E quante volte el can no ha preservà
Dai ladri le richezze del paron?
E quante ancora più nol ga salvà
La vita combatendo da lion,
Per fin restando ne la rissa opresso
Vitima miserabile lu istesso?
9Nè posso trascurar de far menzion
De quei cani amorosi, che a salvar
Dal rischio de negarse el so paron,
I è sbalzai in acqua pronti, e col chiapar
Coi denti un lampo del so vestimento
I l'à condoto vivo a salvamento.
10E un omo scelerato, un omo tristo,
Col titolo de can s'à da chiamarlo?
E sto titolo è giusto? N'ò mai visto,
Per quanto m'abia messo a contemplarlo,
Che sia l'indole soa tanto perversa,
L'ò trovada anzi sempre assae diversa.
11Chi ze del can più pronto e più ubidiente,
Se fin na ochiada, un moto a lu ghe basta?
Arossissa quel spirito indolente,
Che a far el so dover manca e contrasta,
E specialmente le signore done
Contradicenti tanto e testardone.
12Chi pol vantar del can la mansuetudine?
Forsi quei che maligni e intoleranti
Se irita per sistema e consuetudine,
0 quei che in società sempre insultanti
Senza satirizzar no i verze boca,
E mile impertinenze in viso schioca?
13Chi grato più d'un can, chi più de lu
Riconoscente a chi ghe fa del ben?
E pur vivendo sempre tra de un
Nol beve de l'esempio el rio velen,
De malsesti pagando le atenzion,
E i benefizi de persecuzion.
14Omeni, l'amicizia che vantè
Zela proprio sincera? ela invariabile
Co un amigo infelice abandonè?
Quando co ipocrisia la più esecrabile
A l'amigo insidiè borsa o l'onor,
Aveu tolto tra i cani el precetor?
15No i cani no dà minga ste lizion,
I so afeti ze fermi, ze sinceri,
E quando in vita i ga aprezzà el paron
I difende el so corpo arditi e fieri,
E fin su la so tomba i urla, i zeme,
Squasi disendo: sepelime insieme.
16No i cani, i fati parla, no abandona
I so amici paroni a la sventura;
A Venezia ze nota a ogni persona
La istoria de quel can che avea la cura
Per el paron d'andar a pitocar,
E agiuto fedelmente a lu portar.
17O fedeltà del can superba e rara!
Virtù che sora tute in lu se amira!
Mile esempi la fama esalta e nara,
E in ogni parte, dove Febo zira,
De cani fedelissimi l'istoria
A' lassa onoratissima memoria.
18Donca el can per caratere ze bon,
Mansueto, cordial, riconoscente,
Vero amigo, e compagno fedelon,
Sichè sarà onorifico a la zente
Sentirse dar del can da st'ora avanti,
Can de qua, can de là, da tuti quanti.
19E se alcun in progresso vien chiamà
Fio d'un can, cuor da can, razza de can,
De risponderghe grazie l'è obligà,
Mentre in qualunque titolo de can
I più squisiti elogi, e più aprezzai,
Tuti, ma tuti afato, è concentrai:
20Chiamemo pur i ladri, i traditori,
Col titolo de gati, nominemo
Pur volpi tuti i birbi inganatori,
Ai crudeli de tigre el nome demo,
De vipere ai rabiosi, e de suete
A le nostre galanti marionete.
21Disemo porchi pur ai parassiti,
Aseni ai malagrazie malsestai,
Marmote o talpe a tanti scimuniti,
Scimioti ai ganimedi strafantai,
Puliere a le madame sfazzadone,
E brespe a squasi tute le altre done;
22Ma vardemose ben de nominar
Le razze dei briconi e dei inumani,
O quei che ga piacer quando i pol far
Ai altri un mal, col titolo de cani,
Che una enorme ingiustizia al can faressimo
E un caratere inproprio ghe daressimo.
23Se Cerbero è crudel, come vien scrito,
Sto Cerbero ze un can che sta a l'inferno,
E in quel bruto paese a lu è prescrito
De spapolarse l'anema in eterno,
Nè imputarghe xe lecito a pecato
Se 'l sodisfa el dover del proprio stato.
24So ben che la canicola se acusa
Dei calori spietai che la ne manda.
Perchè i prodoti de le volte brusa;
Ma dal calor istesso, che tramanda,
La gran vegetazion deventa ativa,
E la total maturità deriva.
25So che in Omero Achile indemonià
Contro d'Alcamenon, che gavea sconto
Briseide polpetina inzucarà,
Per far al rapitor un vivo afronto
Ogni qual volta che de lu el parlava,
Ochi da can co sprezzo el lo chiamava;
26Nè me ze ignoto che per indicar
La maledica rabia iniqua e fiera,
Che blastemando à fato un dì crepar
La consorte de Priamo, Ecuba altiera,
Subito dopo morta la ze stada
In t'una bruta cagna trasformada;
27E so pur che Diogene la zente,
Per la mordacità dei so discorsi,
Lo intitolava can publicamente,
E dopo tanti secoli trascorsi,
Perchè maligni critici e mordaci,
De cinici ga el nome i so seguaci.
28Ma so ancora che Osiride egizian
Prima d'Achile e d'Ecuba portava
Su le insegne la imagine d'un can,
E co testa da can se venerava
Dal popolo d'Egito come un dio
El sucessor d'Osiride e so fio.
29Sta onorifica e pia predilezion
Val ben de più che titoli inventai
Da invidia, da caluma, e da passion,
Nè mai ze sta i strapazzi calcolai
Per verità inegabili e sicure,
Che in giudicar le serva de misure.
30Se aborisce nel can l'idrofobia,
E l'oror che la infonde ze scusabile;
Ma no l'è un vizio, l'è una malatia,
Nè a colpa mai del can la ze imputabile,
Anzi spesso da incuria la procede
De quei che ai so bisogni no provede.
31Zela colpa dei omeni se i ga
Tisi, variole, tifo petechial,
Che tanta strage sempre à fato e fa,
E insinuando el so velen fatal,
Quanto l'idrofobia, manda in campeto
Tanto quel che lo assiste che l'infeto?
32E in materia de umane malatie,
Quanto i omeni mai no s'in procura
A furor de imprudenze e strambarie,
O col sforzar continuo la natura
Co mile intemperanze e sbrodeghezzi!
Mentre i cani no fa sti bestialezzi!
33No me disè che el can publicamente
Co tropa libertà fazza a l'amor;
Rispondo che 'l lo fa semplicemente,
Nè 'l se ne intende un aca de pudor,
E po se 'l ve fa rabia custodilo,
E deghe bon esempio, e compatilo.
34Nè me disè che i sia fieri e crudeli
Perchè i assalta, i morsega, i spaventa;
Chi ze quei che li arleva; via chi zeli
Che li uzza, li stuzzega e violenta,
Che li amaestra a deventar baroni,
E a scordarse el caratere de boni?
35Nè me disè che in mezzo d'una cazza
A la bestia più utile che esista
Le rechie crudelmente i sbrega e strazza
Che sta bela virtù da l'omo i acquista,
Che no ò mai visto un can contro un bo spinto
Le rechie a morsegar per proprio istinto.
36Se del can ve lagnè perchè qualcuno
Contro l'omo se aventa a morsegar
El can se lagna perchè gh'è più d'uno
Che fieramente i trata a bastonar;
E per la lege antica del talgion
I cani gavarave più rason.
37Perchè el can ze educà dal'omo istesso
A so propria difesa el bulo a far,
E nol passa a far mal, che al punto messo
I maltrati de l'omo a rintuzzar,
E spesso drio i maltrati lu acarezza
Chi l'à tratà co crudeltà e fierezza.
38Ze i cani insoma boni e mansueti
Con paroni pacifici e tranquili
Con quei che à bon umor i è sempre lieti,
Co le done e i putei dolci e gentili,
Nè i ze briconi che per coruzion
D'una trista e cativa educazion.
39Quante volte ò sentio dir da la zente
No insolentè quel can, nol stuzzeghè,
Che lo fe deventar fiero, insolente,
E sto fato comprova, che no ze
El can per propro istinto natural
Inclinà a la fierezza, e a far del mal.
40Sui talenti del can gnente dirò,
Che nele idee no i entra del mio assunto,
E po ze tanti i fati, che no so
Come tratar un cussì esteso punto;
E se go comprovà che el can ze bon
Go afato sodisfà la mia intenzion.
41No posso nonostante obliterar
De dir che ai nostri dì s'à visto un can
A le carte coi omeni zogar
Usando i denti invece de le man,
E a scriver, e a far conti brevemente,
In fazza a moltitudine de zente.
42Roseli, el mio lavoro ze compio;
Nè so se el ve sarà de agradimento,
Qualunque el sia, ve digo el parer mio,
Scolteme, amigo, ma scolteme atento:
La racolta sarà completa e intiera
Se ghe stamparè drento sta cagnera.
.jpg)