Siè cantè sora la villa/Cantà IV
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Cantà III | Edission e fonte ▼ | Cantà V → |
MI no so perchè tanti, e tante sia
Alla Villa contrarj, e che ghe vegna
La stizza a starghe, e la malinconìa;
Se quarcuno, o quarcuna nar ghe chegna
Per el bosogno, no i se grattaria
Tanto se ghe vegnes'e rogna, e tegna;
I se storze, i se messia, e tanto i fà
O per no narghe, o vegner via de là,
Anzi ho sentù pì d'un che me disea,
Che quando ghe conven anar de sora
Se ghe strucca su el cor; gne i ghe starea
Per sempro gnanca se i ghe desse agn'ora
Un Zecchin, che ghe par d'esso in galea,
O in mezo al fogo, e che ghe par che i mora,
Tanto la Villa ghe mette passion,
E no so perchè i habbia sta punion.
Che in Villa no ghe sia pì libertà,
Che chigo no se staga anca pì sani,
E con sparagno grando della Cà,
No i lo pol dir; se perchè coi Villani
No ghe piasa trattar, per verità
Semo nefandi, ma semo Cristiani,
Semo tutti Fradei, semo una pasta
Sibben la man in tutto i ne contrasta.
Ma se i ne vol tegner alla cadena
E sotto pè, gne mai darne rason,
Ghe vol pacenzia, se se morde, o rena
Quarche volta anca contra el so Patron,
L'è bon dir con la panza sempro piena:
Quel Villan l'è un furbazzo, l'è un guidon,
Se dalla fame quarche impropietà,
Quarche volta de usarghe l'è sforzà.
Questo el digo così sora del caso
Perchè m'è vegnù al tagio sta facenda,
No stè per questo a ranzignar el naso
Squasu de forbesarve mi pretenda;
A proposito torno, e se ve piaso
Tornarò a repigiar la me lezenda,
E me stupisso como tanti i strilla
Senza tanta rason contra la Villa.
E pur ve farò vedro come questa
La dovarea pì d'agni gran Città
Piaser a tutti, e fora della testa
Cazzarse la punion che i s'ha ficcà,
Che sia la Villa quella donve resta
L'Homo for del so centro, e impresonà,
Quando la Villa è 'l logo pì perfetto,
Per godro, e per gustar agni diletto.
In fatti donve mai se pol cattar
Logo, donve se goda pì de chi,
Se chigo gh'è d'agni piaser el mar
Volteve, revolteve don volí;
Respirar agni cosa chigo 'l par
E giubilo, e legrezza, anzi de pì
Quanto godro se pol dai coppi in zò,
Tutto la Villa sporze e 'l mostrarò.
Quan Dio creò fin là da quei momenti
L'Homo in un campo logo de piaser,
E che 'l ghe dè i so cinque sentimenti,
Nasar, gustar, toccar, sentir, veder,
Guarda allora el ghe dise, Damo, e senti
Quante cose te dago da goder,
Sazia pur i to sensi, habbi diletto
Su quanto ch'hò per ti fatto perfetto.
Donca l'Homo al piaser naturalmente
Deve incrinar, e no ai travagi, e guai;
Donve donca se gusta, e vede, e sente,
E se tocca, e se nasa, cosse mai
Pì diverse, pì belle, e confacente
Al gusto, se no donve tai, e quai
Così mal volentera i vive, como
Se fus la Villa Prucatorio al Homo?
Bel Prucatorio in fatti, donve 'l senso
Dell'occhio senza intoppo, e impedimento
Vede quanto che 'l vol, donve compenso
Catta la debolezza, e de istrimento
No l'hà bisogno, perchè squasu immenso
E 'l spazio donve squasu in t'un momento
El pol vedro alla libera infinite
Cosse, dal Dio della natura unite.
Nè un pò per le Cittè, cossa vezio?
Se no che muri, fabriche, e turioni?
Cosse fatte dall'Homo, e no da Dio,
Cosse tutte dell'arte anzi invenzioni
Della superbia, e dell'iniquo, e rio
Nostro humor, che ne fà che ne fà tegner d'imboni,
E pì seguri senza mai pensar
Che semo terra, e terra hem da tornar.
Cossa de bon se sente in la Città?
Musiche, soni, canti squasu agn'ora,
Ma da chi mai la Musica è inventà
Se non dall'Homo? e dirò pezo ancora
Che al dì d'ancò la musica è sfalsà,
E l'anima col corpo trà in malora
E la musica ancò l'è quel incanto
Che favorisce alla lusuria tanto.
Desime in le Cittè cossa se gusta
De bon, che possa dirse che sia bon
De so pè? Che pò in fine no desgusta
Le viscere, o ve tosega el magon?
E cosa ghè per dilletarse l'usta,
Se no sporchezzi, e puzza agni canton?
Donve dirlo che no se fà marletto?
Questo dei Cittadini l'è l' diletto!
○ strambi, o matti ! nè un pò sora in Villa,
Donve la recchia d'agni tempo ghà
Da divertirse, osei che canta, e strilla
Con stupenda, e gustosa varietà,
Canti de Pastorei, como che i stilla
Senz'artificio, e con simpricità;
Quel bisibilio d'Ave, e Zeffiretti,
Quel sussuro dell'acque in tei sassetti.
Cossa chigo se vede che no daga
Gusto subito agl'occhi coi colori
De millio sorte? Subito ve paga
La vista el prà, e la riva coi so fiori,
Con spighe, e frutti la Campagna vaga,
Tutta roba che fà da millio odori,
Chigo un boschetto con la so verdura,
Là na collina, e chigo na pianura.
Là na filla de pioppe, e de morari
Ve coerze un stradon che ve innamora
Chì un montesel và via du tri meggiari,
Pò na sgombià de bosco el ve trà fora,
Chì na bell'acqua donve i Molinari
Fà 'l fatto so; la zente che laora,
Un zappa, un'ara, un pella, un fà la legna,
Chi na cossa, chi n'altra, oh vista degna!
Cossa ghè mai de fora che ve offenda
El naso, con la spuzza de Cittá?
Chigo no cade che neguno spenda
In giandine de balsamo odorá,
Perchè chigo no ghè quella facenda
De comodi, e de sfondre in ogni Cà,
Chigo no ghè mazzei, gne beccarie,
Gne fonteghi de robbe ingaranzie.
Chigo no sentarì mai quel stufin
Che sente in le so case i Cittadini,
O in quelle so cosine quel freschin
Che ghè sempro; quel star così vesini,
E le stradde sì strette, un odorin
Fà sempro ingrato, e quei introi sassini
Che roversa el magon, fa vegnir sù
Alle Donne la mare, e 'l pare a nù.
Dir mo che ghavemo chigo an nù
Quel tuffo malenazo, e sfondradon
Che ve fà angossa, e che ve fa trar sù
Le buelle, e de fatto havì rason,
Perchè con politezza no è tegnù
Gne Gesie, gne botteghe, gne cason,
E per questo ghe sà da quel odor
E da quel tanfo, che ve strenze el cor.
So che nè via struccandove in le spalle,
E col fazzol stupando e naso, e bocca
Quando arento passè alle nostre stalle,
Ma boson che la diga, e che la schiocca,
Che an vù stè ben de vacche, e de cavalle,
E ven zonze ogni zorno che le fiocca,
Onde no credarea per sta rason
Che da vù altri ghe saves da bon.
Ma almanco in Villa al mal odor suprisce
El bon odor ch'agni stagion ne dà
Quan la fava, e la vigna la fiorisce,
Na muschiaria la sona, e quando el pra
De millio erbe odorose se vestisse,
Quan se mena su 'l fen che s'ha segà,
Ei peri, e i pomi, e l' vua quando la bogie,
I è tutti odori che fà millio vogie.
Guardè un pò se in la Cà del Contadin
Sentarì mai puzzar quello che 'l magna,
Se la carne ghe sà mai da freschin,
Se 'l gnocco, la polenta, la lasagna
Ghe puzza mai; in Villa el ventesin
Porta i cattivi odori donve stagna
L'aria in te le Cittè, donve no zuga
El vento, che le Ville purga, e suga.
Del gusto che se gode chì de fora
Mi no voi dirve gnente, zà savì
Che quanto in le Cittè godì d'agn'ora
De pì prezioso tutto ven de chi,
Erbazi, e frutti che no vedì l'ora
Che ve i portemo; in somma quanto avì
De gustoso, da bevro, e da magnar,
Tutto da nù in Città ve sè portar.
Ma chigo a dirla, ghemo sto vantazo;
Che la robba è pì fresca, e pì perfetta,
Gne mai lè stracca, e smasarà dal viazo,
E alman chi la se gode a dirla netta
Senza tante gabelle, e pagar l'azo
A quei che la revende; o de fà incetta
E pò fu sempro universal punion
Che 'l Villan magna mei del so Patron.
E de quel spasso mi no dirò gnente,
Che gode a star in Villa el Cazzaor,
Quel che osela, che pesca, e che ten mente
Ai altri, e che vol far da gricoltor,
Comandar; ordenar alla so zente,
Far alzar, far spianar come che occor,
Far piantar, incalmar, rettrar, bonir,
Redur le so Campagne l'è un gran dir.
Cattè gusto megioro le podì
Seguro che chi no g'hà gnente al Sol,
De sto bel gusto che ve digo mì
Ne pol saerde, e giudicar no pol
Cossa sia godro a nar de chi de lì,
For per i campi in qual staggion se vol
Osservando el bosogno, e delettarse
De campi, e d'anemai senza stufarse.
Questo se pol ben dir quell'esercizio
Che alletta l'Homo, e 'l divertisce assè,
Questo è sempro operar con bon giudizio,
E questo se pol dir gusto de Rè,
E questo ten lontan l'Homo dal vizio,
E 'l fà scampar a vedro do tre etè,
Questo è quel gusto che val un tesoro,
E rennova la bella età dell'oro.
Lezì un pò quel bel libro che se dise
La Bibia, e guardè un pò quel che fasea
I Rè in quei tempi, i Grandi; un Paradise
Drè ai so campi, ai bestiami i se godea;
E i nostri al dì d'ancò mezze camise
Quan i è de fora i dis che i è in galea,
Che star tanto in campagna no bisogna,
E far el so interesso i se vergogna.
Che s'ha da dir? che allora i era matti
A cattar el so gusto in ste facende
Della campagna? e pur questi i è fatti
Che no se pol negar, così la intende
Quei del bon gusto, e che no hà tanti flatti,
E che vol star lontan da quel che offende
L'anima 'l corpo, e che vol de bon passo
Nar da Cristian, e no da porco grasso.
Gusto e piaser dirò quel della Villa
Che 'n Città no ghè tocca gnan na fregola,
Nar senza suggecion come se stilla
Descalzi, e in spolverina, e senza regola
De passi che ve struppia, e ve destilla,
E senza aver da nar con la petegola
Che voggia brazzo, e che ve faga nar
Como le masenete in fianco, e al par.
Gusto mi ve dirò gne l'è nà faola,
Quel magnar quan se vol senz'aspettar
Che sona nona, e poder nar a taola
Quan è cotto quel poco de disnar;
In Città tante volte, e tante i sgaola
Dalla fame, e bisogna spazesar,
Finchè vegna un da Piazza, un da Palazzo,
O che manda el Patron a Cà el ragazzo.
Gusto mi ve dirò quel levar sù
La mattina a bonora alman l'Istà
A godro el fresco, e nar don volì vù
In stalla, in l'orto, in tel brol, in tel prà,
Calzà, descalzo, in braghe, col sortù
Anca in camisa che la libertà
La ve permette nar como volì,
E quando è caldo fè pò el mezzo dì.
La sera co è zo el Sol nè sora a spasso
A spazzesar all'ombra, e in tel istesso
Tempo, che nè bel bel a passo, a pallo.
Podì osservar, e fè 'l vostro interesso
Fora della smarmaja, e del fracasso
De' tanti che in Città (me fia permesso
Dir) che ve rompe el cesto, e dà sgombiade,
O che ve fà impiantar in su le strade.
E po se la mattina vol anar
In Gesia a messa, alman la scoltarì
Con divozion, e ghe podarì star
Quanto ve par, e piase che mai lì
Ve vegnerà pittochi a desturbar
Como che i fà in Città; se fusse mi
Quel che da sesto al mondo, o che i farea
Star su la porta, o che i vada in galea.
Dirì mo che sia gusto, o Cittadini,
Quel vostro caminar per le contrè
Sempro su i sassi, che struppia i penini
E fà vedro le Stelle quante i è
A quei che hà gotte, o calli, o occhi pollini,
O buganze l'Inverno, ongie incarnè,
O se piove nar sotto a quei grondai,
O in mezzo como i aseni, e i cavai?
Dirì mo che sia gusto in la Città
Quel dover caminar con sugicion,
Offervando se quel v'ha saludà;
Se quella Dama ve fà un ropeton;
Guardar de dar la man a chi la và;
Ne far altro che dir; schiao me Patron,
Sugicion tale che se ve scapesse
Boson raccomandarse alle braghesse.
In Villa almanco se ve salta un fratto
Podì sorarve e sollevarve lì,
Che negun ve dirà porco, ne matto,
Gne mal creado, gne ve sentarì
A parar via; ma chi donve m'imbatto
Fago quel che me occore, e che voi mì,
Ma se son in Città boson che creppa,
Se no voi na peada, o na gran sleppa.
Nò nò pì tosto bosognarà dir
Della me canta in fine, e in concrusion,
Che in Città lè na cosa da morir
Per quei che ghe vol star sempro a mason;
Gne materia mazor se pol sentir
Che contendro, e rebbatro sta rason,
Che la Villa al piaser l'è fatta a posta,
Chigo el se gode; onde no gh'è resposta.
.jpg)