Siè cantè sora la villa/Per l'anno 1758
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Per l'anno 1757 | Edission e fonte ▼ |
FOrsi dirà quarcun: Cossa farallo
St'anno Ventura el Vendri Gnoccolar?
Ma è trent'anni e passa se no fallo
Che squasu agn'anno hò bù da bisegar
In tei Gnocchi; onde an st'anno salta in ballo,
Cellenzia, in grazia vostra a sgazolar,
E per illuminar certi marzocchi
Prubicarò la nobiltà dei Gnocchi.
A ti me raccomando, Musa cara;
Ch'in Veronesa rustega favella
La vena te me spandi e netta e chiara;
No de Slicon ma de Valpolisella.
Na bona zucca me savarea cara
De quel, che quan de togo na Scudella
N'estro me mette, un spirito, na vena
Svelta daspò disnar e daspò cena.
E Vù, Degno Mereolo Rettor
Che ne fè godro i frutti in te sto dì
Del pì amoroso e generoso cor
E per quello che manca ancò supprì,
E con ugual bontà ne fè sto anor
Che forsi forsi no hà godesto pì
D'aver un Fiol Verona al so governo,
Governo tal che ve fà un Lomo eterno.
A Vù donca Rettor slusente e d'oro,
M'aldego presentar sta Gnoccolaria,
E tolila per semprice laoro
D'un bisbetico humor, d'un che zavaria,
Defenderla ve prego da queloro
Che vol haver la cognizion primaria
De tutto, e i vol tagiar i pagni adosso
A questo e quel, e compatir no i posso.
Prubicarò la nobiltà del Gnocco.
Quanto che la sia granda, o quanto antiga,
Donve che no bisogna mi na tocco
E no voi che per mi nessuno ciga
Da quei che per lustrar un sasso, un zocco,
Un scartafazzo tanto se sfadiga;
E no i hà mai cercà la rason bona
Perchè ai Gnocchi st'anor fazza Verona.
Nasce dalla svertù primieramente
La vera e più squesita Nobiltà,
E nasce questa secondariamente,
De bona zocca dall'antichità,
Nasce da belle azioni finalmente
Fatte a pubrico ben e utilità,
E per ste tre rason digo benissimo
A dir che 'l nostro Gnocco è nobilissimo.
Qual mazor e megior sustentamento
A l'Homo podea dar la man divina
Che l'Adipo o sia grasso de formento
Ch'altro no se pol dir che la farina,
Così con tutti mi la intendo e sento
Che sà de Litra e de lengua latina,
E l'Adipo frumenti, altro no fù
Che la farina c'hà tanta svertù.
E de farina è fatto el Gnocco vero
Quello che in te sto dì se fà a Sanzen
De sormento legitimo e sincero,
Impastà netto e gramolà ben ben
Ben cotto e ben conzà de bon bottero
E bon formagio, e un bon biasoto pien,
Per mi ghe vorrea far el privilegio,
Che l' Gnocco passi per un cibo Regio.
Cibo Regio, e ve digo anca perchè
È robba la pì bona, e pì squesita
Pì che tante piatanze strafozè,
La più preciosa e necessaria vita
Certo è quella dei Monarchi, e Rè
Senza che tante autoritè ve cita
Bosognarea che i Rè sempre i magnesse.
Gnocchi e sani così i se mantegnesse.
Perchè i so magnarini e i so paggiughi
Da sti Coghi inventè, sti fracandò
E ragù con ste droghe, estrati, e fughi,
El magon ghe fà nar sempre sù e zò
E causa in le buelle tanti fughi
Tante fremme struzioni che no sò
Como che i scampa gnanca quindes dì
Sti Ricchi e grandi, che vive così.
Savì che la providenzia Devina
N'hà dà per cibo prencipal el pan
Fatto de pura e semprice sarina
E questo è l' vostro cibo cotidian
A tutti quanti necessario in fina
Che vivemo, e boson darghe la man;
Ma per provar quel che pretendo, basta
Che 'l Pan e 'l Gnocco sia la stessa pasta.
Del Gnocco donça credo haver provà
De mantegnerne sani la svertù
Como pur la so longa antighità
Fin da quando el sormento l'è nassù,
E far farina l'Homo s'hà inventà,
E in tanto pan, e Gnocchi farlo sù
Che forsi innanzi che ghe fusse forno
El Gnocco in tel parol andava intorno.
Ma donve è mai le groliose imprese
Del Gnocco, che ghe dà sta nobiltà?
Quando del vostro Gnocco a dir s'intese
Ch'abbia satto del ben a na Cittá?
Che se a sto passo me sarà cortese
El benigno Lettor, e lezzerà
Quel che del trentacinque in sta casion
Fu stampà chigo me darà rason.
Nobilissimo Gnocco voi fenir
Perchè chi leze no pol star pì saldo
E sta fredura no pol compatir
Per l'aria che ghe ven da Montebaldo,
Ve prego intanto in confidenza dir
Che de mi se recorda el Sior Gastaldo;
No domando tabarri come i Scrocchi
Ma solamente el me piato de Gnocchi.