Soneto co' la coa
|
Edission original: |
Luigi Plet, Versi di Luigi Plet, da lui corretti e dati in luce di nuovo, per poter sostenere la sua gratuita scuola di canto, Venezia, P. Naratovich, 1857 |
|
Fonte: |
| Edission e fonte ▼ |
Ah Musa mia! mia Musa! indovinè,
Corpo de baco! cossa m'à toccà
Ne l'afar de le otave che m'avè
In avril sugerìo sul bacalà?!
5Mi le go scrite, come ben savè,
Da una terza persona interessà,
Per compiàser un certo Bosa, che
De farghene un regalo s'à pensà
A un so corispondente de Trieste,
10Che ogni tanto ghe dona de quel pesse,
Mandandoghele prima de ste Feste1,
Per farse creder splendido e per boria,
Drento in t'una soasa che podesse
Eternar del so nome la memoria —
15Ma questa, de la storia
No la xe che una parte; aspetè un poco.
Chè qua capita el resto, el più bel tôco:
L'ò fata mi da aloco,
Perchè, volendo contentar diversi
20Che ga trovà spontanei quei mii versi
E da non andar persi,
Nel farli co' la stampa publicar,
Dovendo un frontespizio architetar,
L'ò architetà che i par
25Per un mio mecenate espressamente
Fati, quando el sior Bosa veramente
No à tirà fora gnente —
Peraltro de sta cossa no me lagno;
No li ò scriti co' vista de guadagno;
30E lu tende al sparagno
D'altra parte, quantunque milionario,
E nol tòlera mai nel proprio erario
El minimo divario —
Ma quelo che me pol (parlo co' vu
35Perchè la cossa resta fra de nu),
Quando ghe penso su,
Xe che lu, per la copia destinada
A figurar nel quadro, e che xe stada
Per Merlo una secada;
40Per do de l'edizion che, tuta quanta,
Xe d'esemplari numerai cinquanta
E d'esser prima vanta,
Za fate anca ligar in cartoncin:
Per altre sie de la seconda, in fin,
45Tirae tutte a pontin.
Da lu per regalarle domandae
E da mi sul momento consegnae
Bele e condizionae,
Credendo farla da cortesanon,
50L'à averto el scrigno e 'l m'à mandà un... croson!!
Dixè? no go rason
Se mostrando lu, fora, tanta caca
E volendo po aver qua, co' la fiaca,
Anca le copie a maca.
55Otener mi da vu vogio a ogni pato,
Per un proponimento che go fato,
Quel che cerco e no cato:
Una parola che finissa in udro
Per poderla spontar de dirghe ludro?
- Note