Tognoto e la Morte (1834)
|
Edission original: |
Giovanni Battista Casti, Scherzi poetici di vari celebri autori italiani e veneziani raccolti da G.B.C., Venezia, Tip. Molinari, 1834 |
|
Fonte: |
Indice:Scherzi poetici di vari celebri autori italiani e veneziani.djvu |
| Edission e fonte ▼ |
Tornava dal bosco
Coi fassi sul colo
Tognoto ma solo;
Ansando, sustando,
Strussià come un can.
Beato, el diseva,
Chi voga in galía;
Che vita bu... e vìa!
Me strazzo, me mazzo
Po... a capo doman.
Me trema le gambe,
Sta carga me struca,
O’ spanto la zuca
Nè posso che a un fosso
Stuarme la sè;
Se arivo po a casa
Un leto de pagia,
Sie fioli che sbragia,
La Lucia me crucia.
So mi po perchè!
El prete me aspeta
Che el vol el quartese,
Me cresce le spese,
I stenti, i tormenti....
Nè trovo pietà.
Oh morte delizia
Dei più desperai,
Finisci i mi guai...
Un baso, e po taso,
Via, cara, vien qua.
E in tera rabioso
Tognoto, a sto passo,
Precipita el fasso,
La morte più forte
Tornando a chiamar.
La Morte mo in quelo
Co falce guada
Traversa la strada,
Che vite romite
L’andava a oselar.
La sente chiamarse,
La gh'è za davanti,
Son qua senza guanti,
La dise, raise,
Me vusto co ti?
Tognoto che vede
Quell'orida schizza:
No go tanta pizza,
Raise, el ghe dise,
Me cargo, bon dì.