Tra un ricevimento e l'altro
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← Vere novo | Edission e fonte ▼ | Udienza privata → |
![](http://upload.wikimedia.org/wikipedia/commons/thumb/5/55/Le_Ci%C3%A0cole_de_Bepi%2C_Roma_1908_%28page_81_crop%29.jpg/400px-Le_Ci%C3%A0cole_de_Bepi%2C_Roma_1908_%28page_81_crop%29.jpg)
Interrogabo te et responde mihi.
Job. XLII, 4.
ANCUO no posso. Semo in zerimonia.
Scomenza l'ano e gò da congedar
I vescovi de Saba e Pataconia.
Sti vescovi i gà pressa de scampar
Perchè, la creda in verità sincera,
Ste diocesi le dà massa da far.
Però gò visto queli de Madera,
De Malaga, de Cipro e de Marsala...
Gò cercà quel de Vermut, ma no 'l gh'era.
Xe vegnuo dopo i Cardinali in gala
Che i m'ha augurà i zent'ani a denti streti
E i rideva de gusto per la scala.
Ma, cossa vorlo? Carità de preti!
Tuti i vol esser Papa e da lontan
I m'augura la morte, povareti!
Xe vegnuo dopo el cogo, el zambelan,
El nònzolo, el postier che i m'ha pelà
Co la stocada de la bona man.
Che bele usanze, ciò! Sia budelà,
Che ghe piopo un non expedit, che piopo,
Giusto de quei de prima qualità!
Ostregheta! Sul stomego gò un gropo,
Una smania ingossàda da fifar.
Povaro Bepi, chè deboto schiopo!
Xela una vita questa? I me fa star
Co le còtole bianche e col zucheto
In piè, fino a la sera a ciacolar.
«Reverisso! Bon ano! El mio respèto!»
E intanto i me tien quà come in galera...
Vedelo? I m'ha tagià fino el zufeto!
Libertà, libertà santa e sincera,
Lontan da Roma e da Mery del Val,
Perchè non posso vegnir via stasera?
Me recordo la note de Natal
Che Venezia era tuta in alegria
E le gondole in calca zo in canal
E le done coreva in Pescaria
Drento un fumo de fritole bogienti
Da desmissiar un omo in agonia.
Tuti i rideva libari e contenti
E sora i ponti e zo per le calete
Passava i cantarini co i stromenti.
Se sentiva un trilar de canzonete.
Un odor de naranze e buzolai
Squasi da far pecà d'esser un prete.
San Marco giera pien de inamorai
A mezanote, e l'organo sonava
Che chi lo sente no lo scorda mai.
E mi, contento, su l'altar pregava
Per Venezia e per tuti Idio Signor,
Alzando le do man che me tremava...
O Venezia, Venezia! e con che cor
Te benedisso sempre a cussì sia,
Anca da la preson del mio dolor!
Benedeta da Cristo e da Maria,
Caro pensier dei zorni miei più grati,
Non te vedarò più, Venezia mia!
Basta... i me ciama, perchè vien i frati,
Queli che insegna el Silabo ai putei
De Palanza, de Albano e de Frascati...
Si.. capisso!... ma i porta pochi schei
E se a la Chiesa i bezi no ghe vien,
Digo anca mi: me la saluda lei!...
La benedisso e la me vogia ben.