Tre soneti
|
Edission original: |
La gloriosa epopea, MDCCCXLVIII-MDCCCXLIX, nei canti politici dei poeti contemporanei e del popolo d'Italia, a cura de Angelo Lanzerotti, Venezia, C. Ferrari, 1886 |
|
Fonte: |
| Edission e fonte ▼ |
IN DIALETO VENEZIAN
Fradei per carità pensemo al serio,
A monte le question, i dispareri,
Fidemose del nostro Ministerio
4E a chi toca lassemoghe i poderi.
Se più no semo schiavi de l'Imperio,
Se no gavemo più paroni austeri,
No stemo a secondar el desiderio
8De viver senza fren superbi e fieri.
Ascoltemo la lege, el bon consegio,
La prudenza, la savia disciplina,
11Operemo, ma sempre per el megio.
Altrimenti la patria va in rovina,
E podarà tornar l'Aulico e el Regio
14A portarne la Forca e la Berlina.
Semo tuti soldai! sonè el tamburo,
Presto el fusil che me lo meta in spala,
No son più schiavo, più no stago duro
4Retore d'una porta negra e zala.
Viva San Marco ancuo con cuor sicuro
Lo posso dir, e viva Italia in gala
Vestia de tre colori, e viva el puro
8De Patria amor che libaro se esala.
Pio Nono, Tomaseo, Manin, fradei,
Citadini, quà tuti che ve basa,
11Eco i vostri ritrati, ah! sì sè quei!
Viva la Libertà.... ma stando a casa
Vechio, mal san, confuso co i putei,
14Bisogna che senta sospira e tasa.
Dunque no podarò vestir mai più
La divisa del forte, del soldà,
Perchè me xe sparìa la zoventù,
4Perchè se crede che me manca el fià?
Se po in cuor gavarò co la virtù
L'amor de Patria, e de la Libertà
L'odio potente de la schiavitù
8Che ose e forza ancora me darà;
Perchè se impedirà che possa star
Armà con tuti, e no se vorà dir
11Che adesso qualche cossa posso far?
Alfin, perchè se me vorà impedir
Che bon esempio a i altri possa dar
14Nel soldà tra le file col morir?
- 15 Aprile.
- El Vecio Barcariol.
- 15 Aprile.