Un'onta e una ponta/21
|
Edission original: |
Giovanni Cristofferi, Un'onta e una ponta, Venezia, Pellizzato, 1907 |
|
Fonte: |
Indice:Cristofferi - Un'onta e una ponta, Venezia, Pellizzato, 1907.pdf |
| ← 20 | Edission e fonte ▼ | 22 → |
- 21.
Se vero scopo xe del socialista
redúr la vita manco infame e dura
garantindoghe 'l pan a la creatura
che sgóba, so' anca mi de quela lista.
Chi, dal gnente, richezze e onori aquista
co' l'industria i comerçi e agricoltura,
dei povareti el deve tiórse cura,
se no, i ghe dirà perfido, egoista.
E i fortunai ch'eredita milioni
ga stradópio dovér; prima per lori
e po' in sufragio dei so póari noni;
perchè — da Adamo in quà — sti gran signori,
prima de Conti, zà i xe stai... baroni,
e i ghe n'ha fato de tuti i colori.