Un sogno (Giovanni Pozzobon)
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Cara Catina mia, son insognà
Una cossa che a dirla me vergogno,
Son insognà (ma al fin l'è sta po un sogno)
4Che mi con vu me gera maridà.
Ma l'uno e l'altro gera desparà
Per aver fato sto grosso codogno.
Da una banda gavevimo el bisogno,
8E da quel'altra la necessità.
Scontenti, malinconici, afamai,
Ogni dì sempre più l'andava mal;
11Mocolavimo come renegai.
E senza bezzi e senza capital,
Pieni de cuche, de miserie e guai
14Alfin semo redoti a l'ospeal.
Se sto sogno bestial
El se verificasse, che nol so,
17Starassimo pur freschi tuti do!