Un studente in siopero
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Un inoçente | Edission e fonte ▼ | Una domanda di fisica → |
— Ogni zorno sto ministro
se ne pensa 'na de nova!
xe un bel toco che la cova
e volemo sioperar.
El vorìa che se savesse
la materia in fin de l'ano;
varda mo che caso strano!...
xela gnanca pretenzion?
Lu, sicuro, no conosse
quel che dixe Fusinato,
un studente no xe nato
co la vogia de studiar!
Cossa importa se mio pare
me darà do scopeloti?
mi co i altri xovenoti
vogio esser solidal,
e protesto vivamente
a le smanie che ga Nasi 1
che aprofita in tuti i casi
de la nostra gran bontà.
Se faremo, come sempre,
presentandose a li esami,
la figura dei salami,
questo ancora pol passar;
quel che importa xe che Nasi
de dispòner se ga inteso
ch'el ne fa bociar de peso
no savendo la lezion.
Questo po se ciama tropo
tor in giro le persone,
e saressimo ben mone
de no farse rispetar.
Fin che a scola i professori
vol passar i bravi tosi
e bociar i più ritrosi,
mi za vogio sioperar! —
- Note
- ↑ Ministro della pubblica istruzione nel tempo
in cui fu scritta la presente. (Marzo 1903).