Una certa Donzelona
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
Una certa Donzelona,
Rica nò, ma zentildona,
Che viveva sola, e quieta
Con un cuogo, e una serveta,
5Una sera vol andar
A trovar una regazza,
Che ghe stava squasi in fazza.
Ma, voltala apena via,
Dise Toni ala Maria:
10Che se femo i macheroni?
Fali pur, ma che i sia boni,
La risponde, mi son quà:
I va donca in buratina,
E i se tol dela farina.
15In t'un sùpio i l'à stampai.
E ben coti, e informagiai
I li à messi in t'una squela;
Ma sentì che cossa bela,
Veramente strabelona!
20La Parona bate in quelo...
Pensè vualtri che bordelo!
Cossa mai fa alora el cuogo?
El li sconde in t'un bel logo...
Crederessi? el furbo comoda
25Quela squela in tela comoda,
E fratanto la Maria,
Chie, per dia! xe mezza morta,
Core averzerghe la porta.
La Parona vien de suso;
30Ma più tosto co del muso,
E la core senza chiaro...
Sentì pur, che caso raro!
Sula comoda, fradei,
Aimemei! la ciga in bota,
35Perchè el cesto la se scota.
Mo che sorte maledeta!
Va disendo la serveta;
Ma sicome la xe dona,
La fa vista sta furbona
40De intoparse, e de cascar,
Per stuar cussì el feral,
E la ziga: oh, dio, che mal?
La parona, poverazza!
Che ghe crede a sta furbazza,
45Ghe va incontro, e giusto in quelo,
Pronto Toni, ma belbelo;
El s'acosta al contrabando,
E zigando: cossa è stà?
El lo porta via de là.
50Dopo el ride che 'l se strangola,
La Parona in tela zangola
Va vardando, e no ghè gnente:
Come xe, mo sto acidente,
La se taca a predicar...
55Se pol dar? mo che dolor!
No go più provà el magior.
Mo che mal! che mal xe questo?
Caro Toni, via, fa presto,
Presto, catime un dotor,
60Chè l'angossa me va al cuor.
Vago, el dise, vago subito,
E in t'un subito el xe là,
C'un chirurgo dotorà.
Questo prima fa el so ofìzio
65Con prudenza, e con giudizio,
E po' el dise francamente:
Questo, è fogo certamente,
Ela, Siora, s'à scotà...
Vardè quà, che vissigoni,
70I par tanti macaroni!
Fogo nò, mi son segura,
Questa xe una macaura,
La responde m'ò sentà
Troppo in pressa, e m'ò macà:
75Sior dotor la vaga in pase,
No me piase el so progeto
Guarirò c'un mio secreto.
La lo paga nonostante,
E la core in quel istante
80A butarse, e la se quieta:
Toni in tanto, e la serveta
Ride a spale dei sioconi,
Balordoni de Signori,
Che ghe crede ai servitori.