Una decision de Vigo
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Le Camare de Lavoro | Edission e fonte ▼ | I Liquori del Zorno → |
Una question dificile
A molti è sta proposta,
Ma un solo è sta capace
La soluzion ga posta.
In un paese prossimo
A veneta cità
S'aveva un campaniel
Dà far per carità.
A cura de bravissimi
Devoti parochiani
Che gà sunà i centesimi
Per molti e molti ani.
Xe cosa assae notoria,
Da tuti ben intesa,
Che deve el campaniel
Star atacà a la Ciesa.
Ma quala la più propria
Sarà la posizion
Ga dito col Piovan
Quela popolazion?
Chi lo voleva vedar
Messo verso matina,
Altri dal lato oposto
Per l'ora vespertina.
Molti per topografica
Postura del paese
I to voleva a drita
Come l'è in tante Ciese
Molti che sa benissimo,
E questo è parer mio,
A sanca de la femena
Dev'esser el mario.
Molti architeti celebri
I à consultà per via
Nessun s'à pronuncia
Dove i lo metaria.
Fra le opinion sì varie
Se a drita o a sanca el staga,
Go dito per cavarmela
Metelo in ogni plaga.
Framezo a tanti dubi
Voria provar, mi digo....
Sarìa sentir l'oracolo
E andar da Toni Vigo.
De Ciesa sapientissimo,
Che certo troverà
El posto dove meterlo
El Paroco dovrà.
Interpelà in proposito
Quala de le do parte
Saria l'indicatissima
Che sugerisce l'arte.
Risponde: che de meterlo
Lu sa, l'à ben capio,
Che molti parochiani
Lo vol aver da drio.
Sta decision solecita
Fata da vero amigo,
La xe ut more solito
Parto de Toni Vigo.