Una zovene Mugier
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
U na zovene, mugier
D'un richissimo Spicier,
Arlevada ala gran moda,
E per questo poco soda,
5Incontrando in t'un mario,
Che al so genio no va drio,
La se inzegna, povereta,
De pelarghe la borseta.
Col consorte andava in leto,
10La vardava soto ochieto
Dove el trava i so bragoni,
No moderni; ma pienoni
De datrenta, de trarini,
De ducati, e de zechini
15Per provederse de bezzi
Da fornirle de strighezzi.
Tuto el zorno po' la gera
In fruston co la massera,
Per comprar dai chincaglieri,
20Dai oresi, dai marceri
Pani, sede, biancarie,
E un milion de strigarie.
La so casa a tute l'ore,
Gera piena de sartore,
25De scufiere, e colarine...
Che duchesse? che regine?
Ancuo questo, doman quelo
Ma sto afar no gà durelo.
Ale tante so mario
30Va disendo: pofardio!
La gran roba gha sta dona
Tuta quanta stupendona;
La so dota gera onesta,
Perchè fata su ala presta,
35No ghe entrava sti salì,
Sti abitazzi, e... che soi mi?
Go un sospeto maledeto,
Che sta dona co so in leto
Vaga alora a scarselini,
40Per robarme dei zechini;
Ma, perdia! che'l saverò:
So ben mi quel, che farò...
Oh, la vogio veder bela
Co sta siora vanarela.
45Cossa falo: el volta via,
E 'l se porta in pescaria
Per trovarse un gambaron
Forte, e san quanto un lion,
E in la borsa co xe sera
50El lo fica con maniera
Dala parte, che ghè l'oro;
E, fenio sto bel laoro,
El la chiama: òlà, Maria,
Vien in leto, vita mia.
55E po' el finze de dormir
Quanto mai, che se pol dir.
La muger va in leto anch'ela,
E la smorza la candela,
E po' dopo a pian, pianin
60La se porta al borselin
Tuta piena de contento,
E co i dei la ghe va drento;
Ma quel can de Gambaron
Ghe dà in bota un tal becon,
65Chè l'angossa ghe va al cuor;
E sorpresa dal timor,
Che ghe fusse là el demonio,
La desmissia Sior Antonio,
Che za gera desmissià,
70Che in t'un salto ariva là;
Ma disendoghe: bricona!
T'oi trovà, cagna, ladrona!
El demonio son stà mi,
Che scoverto t'à cussì.