EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 145 modifica]
VAL DE PORO.1


     Quando no so come passar la sera
e che me salta el solito me mal,
guardo dove che gira la bandiera2
che segna el tempo e vàgo a spasso in val.

     E me rùgolo3 zo par quei sentieri,
col me cagneto che 'l g'à nome Alì
e, par quanto che g'abia assè pensieri,
tuti, ma tuti, i porto via con mi!

     De là dal monte, dove, fiaco fiaco
el paese se ràmpega a metà,
el sol se sconde come el fusse straco
de vendar ciaro così a bon marcà;

[p. 146 modifica]


     da l'altra parte, tuta fresca e sana,
con un far da parona, in meso al çiel,
'na luna bianca, che la par de pana
pian pianeto la navega in batel...

     – Ne la val, no gh'è ciassi, e gh'è un boscheto
dove cresse le piante da arlevar,
e no gh'è gnanca el solito fosseto
che ne vegna tra i piè par ciacolar,

     ma quasi sempre el paroco, che dise
el breviario, sentado in fondo al prà,
e là, in quel posto, l'ha piantà radise
e no gh'è santi che el se mova un fià.

     Quando le foie, taca a voltar via
dal primo sono, e i grii taca a siolar
'na rosarieta de malinconia
che ne mete la voia de pensar;

     quando le stele taca a desmissiarse,
co la scufia in traverso, e mal pontà,
e i cani in volta, i seguita a ciamarse
da le casàre4 perse in quà e in là...

[p. 147 modifica]


     Torno a retàr la strada de i sentieri,
col me cagneto che 'l g'ha nome: Alì...
E par quanto che g'abia assè pensieri,
tuti, ma tuti, i porto su con mi!

     Le pegore, vien su co la so lana
e i agneleti che sta a pena in piè,
e par strada, se incontra 'na campana
che tontonando la vol dir: tornè!

     E torna tuti, e quasi tuti i tase,
che a le nove, in montagna, i vol dormir,
e i lumeti che gira par le case
uno a la volta i spèssega a morir...

     Alora solo, dopo che a le tante,
s'ha messo a cucio anca quel poro Alì,
sento el to cor, che el bate da distante,
ne la to casa, parchè el pensa a mi!



Note
  1. Val de Poro: una valletta di Bosco Chiesanuova
  2. bandiera: banderuola
  3. me rùgolo: mi lascio andare giù per la china.
  4. casàre: cascine.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Val_de_Poro&oldid=70663"