Venezia al scuro
|
1917
|
|
Edission original: |
Umberto Foà, Nuove rime veneziane di guerra e di pace, Firenze, Libreria Internazionale, 1917 |
|
Fonte: |
| ← Ai lontani | Edission e fonte ▼ | La zornada del Canalazzo (avanti guerra) → |
Al Senatore Pompeo Molmenti.
La xe tanto bela de sera
(e a dirlo per çerto no falo)
che par che ai gran mali la guera
la gabia zontà sto regalo
5de fàrnela vèder cussì.
Xe za trèdese ani che al scuro1
'na note cussì l'avea vista
in mezo ai bacàni, e ve zuro
che me volea far socialista
10per vèderla ancora cussì.
La basa la so bavesèla2
"Stài!" "Premi!" se sente sigàr,3
la par 'na divina putèla
che al scuro no fa che sognàr.
15Mai bela l'è stada cussì!
Nei veci palazzi i balconi
xe neri coi scuri serài,
le barche no ga più baloni....
Chi sa se se fa più pecài
20al sconto, nel scuro, cussì?
In Piazza, ne le Merçerie
silenzio, ogni luse xe morta,
sui ponti xe inçerto ogni pie,
se sbrissa, se sbaglia de porta,
25la xe più imbrogiosa, cussì!
I campi, i campieli, le cale
xe scuri co' fa un funeràl,
se uno ve vien drio le spale
stè atenti! Gh'è un morto in canal!
30Chi xe che xe morto cussì?
Xe un caso opùr s'àlo butà?
Ma questo no turba i morosi
che parla co più libertà,
lontani dai oci invidiosi
35xe belo basàrse cussì!
Sicuro, ghe xe i brontoloni
che perso ga al scuro el morbin,
che i vada sti nostri paròni
a Roma, a Firenze, a Torin!
40A mi la me piase cussì!
Sicuro, ghe xe i maldiçenti
che el covo tegniva al Florian,
che strenze la lengua fra i denti,
che trova el silenzio malsàn.
45Che tasa ste lengue, cussì!
Ghe xe de le done ambiziose
che vive per farse vardàr,
che xe deventàe più nervose
se in Piazza no le pol più andàr.
50Che le staga a casa, cussì!
Mi inveçe, se a un ragio de luna,
che pur pol portàr dei malani,
l'arzento risplende in laguna,
rivivo nei tempi lontani,
55co' sempre la gera cussì.
E vedo passàr per quel ponte,
perùca e tabàro scarlato,
un nòbile che in strade sconte
col còdega4 drio, va filato
60a vèder la bela, cussì.
E vedo in quel bel zardineto,
delizia de un vecio palazzo,
un fresco e piaçente viseto,
'na man deliziosa e un bel brazzo
65che ciàma el moroso, cussì...
E vedo dei zafi5 che core
perchè xe scampà Casanova,
e vedo un gran Frate che more,
che forte sostièn la gran prova
70co un stilo nel peto, cussì!
La storia e la nostra poesia,
che vive qua eterne, le vedo
al scuro, co la fantasìa,
che gnanca de zorno no credo
75de avèrghe mài visto cussì!
- Note a cura de l'autor