A 'na superba
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Zogo dei bussoloti | Edission e fonte ▼ | Inverno → |
Quando ti sarà morta e sprofondada
Do metri soto tera,
A farte vegnarò 'na serenada
Su 'na gondola nera.
Vogio cantarte un requie e un deprofondi,
Pregando el bon Gesù
Perchè, belezza mia, ti te sprofondi
Çento metri de più...
E a quel bechin che te farà la busa,
(Se là mi ghe sarò),
Vogio racomandarghe che 'l te imbusa
Un chilometro in zo...
In quela busa vegnarà alta l'erba,
E 'na piera dirà:
«Qui marcisce una giovane superba!»
E tuti spuarà...
E in fra quel'erba cressarà i papavari
Stupidi, senza odor;
Dai fiori rossi, come i to bei lavari;
Fiapi, come el to cuor.
Alora, quel to corpo, veramente
Divin e profumà,
Deventerà patoco e spussolente,
Pezo de 'n can negà...
Se te destacarà i cavei dal cragno,
O sgrendenada mia;
E dal to naso a le to recie, un ragno
El farà 'na scarpìa...
E in -t'i oci bei che tanti merli ciapa
E i sluse come arzento,
Verti alora e svodai come 'na capa,
I vermi ghe andarà drento.
Quel bel bochin che el par un fior nel muso,
E 'l me negava un baso,
Perso i làvari e i denti, tuto un buso
Farà co quei del naso.
De quela lengua longa e serpentina
Che me gà dito bruto,
Le tarme se farà 'na s'gionfadina
A fete de parsuto.
Ah, co sarà dal to bel muso tuta
La carne andada via,
E solo 'n osso restarà, co bruta
Testa, Gesumaria!...
Co bruto vèdar che farà quel viso
Da la carne scarnìo:
Scometo se 'l lo vede in paradiso
Scamparave anca Dio!
E da la panza finamente ai pie
Altro no restarà
Che un tronco duro, çinque steche, o sie,
Come 'n osso d'asià.
Fa pur la bula adesso, e la smargiassa
Per farme rabia a mi,
Se vedaremo, cara, in-te-la cassa
Se ti farà cussì.
Se vedaremo quando che scarnia
Come un spin de sardela,
A farte vegnarò la notomia;
Arivederçi, bela!.:.