A Cupido
|
Edission original: |
Poeti antichi del dialetto veneziano, Volume I: Poesie di diversi autori antichi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| ← Risposta di Cupido | Edission e fonte ▼ | Mattinata a Cate → |
Se ti credi co i lazzi e co le frezze
Tegnirme streto e trapassarme el cuor,
Ti t'ingani a la fè, sier Dio d'Amor,
4Che no me infriso co ste to' straniezze.
Se ti vegnirà con basi e con dolcezze,
E se ti me farà qualche favor,
Son omo da cazzarme in cagaor
8Per amor to', usandome carezze.
Donca meti zoso quel arco e quel baston,
No cercar de piarme nè ferir,
11Che senz'arme son preso a strangoion:
Son un cert'omo che no pol sofrir
D'essere strapazzao dal so' paron;
14La vilanìa no la posso patir;
E mi no so riensir
Co' la se fa de arme, a dire el vero;
17E me crucio e m'afano e me despero.
Me fruo co' fa un pavero
Con basi, con cigneti, con ochiae,
20L'inverno ò caldo, e son fresco l'istae.