A l'ombria d'un costrao de la mia barca
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Quante volte rasono mi soletto | Edission e fonte ▼ | Quando compirà un dì sta gran fortuna → |
A l'ombria d'un costrao de la mia barca,
Stando apuzao tutto pien de pensieri,
Me indormendì criando con Cupido,
Onde i ispiriti corse al terzo Cielo,
Carghi de doia, spenti dal martelo,
Domandando soccorso a Marte, e a Giove.
Subito me respose missier Giove,
Torna presto fio mio, in la to barca,
Che si dovesse ruinar el Cielo,
E te voio cavar de sti pensieri,
E comandar a Venere, e Cupido,
Che pesta, in altri corpi, col martelo,
In quel zonse Vulcan, col so martelo,
E si disse, ve priego caro Giove,
Che castighè sto puto de Cupido,
Nol laga star nigun, in casa, o in barca,
Le brigae no n'ha sempre quei pensieri,
D'andarghe drio del cul, in terra, o in cielo.
Vedeu questu che xe vegnuo qua in Cielo,
Mastruzzao tutto quanto del martelo,
Ni tende in altro, si no in sti pensieri,
Fagando poco conto del so Giove,
Talmente, ch'el se invecchirà la barca,
E sarà stao cason mistro Cupido.
Ecco vegnir corando el bon Cupido,
Con i altri pianeti, che sta, in Cielo,
E si me disse torna a la to barca,
E no te dubitar pi de martello,
Comenzando a ruzar tutti con Giove,
Digando che'l se tiol i gran pensieri.
Onde lagando a lori i mie pensieri,
E me arecomandì a missier Cupido,
Riolando zo, per le niole del cielo,
Toiando prima licentia da Giove,
Trovandome lezier senza martelo,
Col remo in man, al trasto de la barca.
Canzon torniti in barca, e chi a martelo,
Vaga da Giove, che è patron del Cielo,
No stimando Cupido, e altri pensieri.