Quante volte rasono mi soletto
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Quando saroio un dì senza Fortuna | Edission e fonte ▼ | A l'ombria d'un costrao de la mia barca → |
Quante volte rasono mi soletto,
A che muodo Cupido m'ha truffao,
E de homo racional, con bon inzegno,
Son propio un putin, senza prudentia,
E za ottocento dì, von suspirando,
La mia sorte cattiva, e i tristi zorni.
No credo mai a viver tanti zorni,
Che possa stiar in pase, mi soletto,
Anzi pien de dolor, e suspirando,
Crio con Amor, che m'ha cusi truffao,
Benche son certo si havesse prudentia,
E sarave tegnuo, per hom'd'inzegno.
Deh quando meteroio a man l'inzegno,
E refarme de mille mali zorni,
Vuogando la barcheta de prudentia,
Dagandome piaser sempre soletto,
Senza paura d'esser mai truffao,
E lassar ch'altri vaga suspirando;
Diebbio viver continuo suspirando?
Asiando tegnuo di qualche inzegno,
E comportar'anche d'esser truffao,
Ridandosse de mi za boni zorni,
E chol me trova st'orbo star soletto,
El me reprende, che no n'ho prudentia.
Cognosso oime zo che xe la prudentia,
Tamen von drio d'agn'ora suspirando,
Che doverave starmene soletto,
E no mostrar a la zente'l mio ingegno,
Che saria certo in fra puocheti zorni,
Pagarme con Amor, che m'ha truffao.
Devento rosso d'esser sta truffao,
Mi che credo d'haver qualche prudentia,
Ma tal volte se manca, in certi zorni,
Che no val po pentirse suspirando,
Pur e besogna refrancar l'inzegno,
Lassando la vergogna, e star soletto.
Canzon cusì soletto, e senza inzegno,
Von suspirando i mie cativi zorni,
Privao de prudentia, e puo truffao.