A la Corte d'Assise
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← A chi legge | Edission e fonte ▼ | Bruta, ma furba → |
Alzatevi, imputato!
La vostra professione,
il vostro nome dite,
la vostra condizione.
Go nome Piero Mòcolo,
de profession murer:
mi go imparà da picolo
quel'unico mestier;
so un povaro infeliçe
che vive de pan suto,
go quatro fantolini....
e questo no xe tuto;
go el pare senza un ocio,
mia mare meza sota,
mio barba, povareto,
el ga 'na gamba rota....
Sta ben, sta ben, di questo
non me ne importa un fico;
ed ora rispondete
a quel che qui vi dico.
Co lu no vol che parla,
mi no dirò più gnente!
Voi siete qui imputato
d'avere, il due corrente,
gettato giù da un tetto
un certo Pelagato,
per modo che sul colpo
morì quel disgraziato.
Se avete qualche cosa
da dir per discolparvi,
cercate farlo presto:
son qui per ascoltarvi.
Su quelo ch'el m'ha dito
lu çerto ga rason,
ma no xe mia la colpa
se adesso so in preson,
la xe del mio compagno
che ormai no vive più....
per conto mio, go fato
quel che m'ha dito lu.
Mi, co la bon'anema
de quel che go copà,
giustevimo un coverto
in campo san Tomà,
e là, per gelosia
su afari de mestier,
lo sento che 'l ofende
mia mare e mia muger.
Mi çerto per ste cosse
no go temperamento:
me xe saltà la mosca
al naso, e un bel momento
lo go ciapà a mez'anema,
e fora del coverto
sporzendolo, go dito:
― Compare, mi de çerto,
se mai no ti prometi
de farla terminada,
te buto co sti brazzi
in mezo de la strada! —
e lu, che in gran pericolo
s'ha visto de cascar,
ga dito: “Piero mio,
te prego de scusar,
te prego, Piero, mòlime,
agiuto, per pietà!....„
e mi, sior presidente,
cussì lo go molà.