A spasso co le rose
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← La passe del brol | Edission e fonte ▼ | Ancò nevega → |
– Rosa de campo, quante foie ghèto?1
― Ghi n'ò quatro, signor, par me belessa!
Do, le me serve par fornirme el leto,
quando gh'è qualche bao2 che me caressa;
co la tersa me fàbrico un corpeto
quando a la festa vago a prima messa...
La quarta foia, me la roba el vento;
ghi no quatro, signor, se l'è contento!
– Rosa, rosana 'scolta do parole:
ti te sì una regina in primavera,
ma le petegolone de vïole,
le discore de ti matina e sera...
Te si nata con èle, in meso a l'erba,
e pur, le dise, che te sì superba. –
L'ha risposto così, rosa rosana;
che tante volte l'aparensa ingana!
– Rosa de bosco, frastornà3 de spine,
qualche vecio dolor ti te me scondi,
ma se la verità te me rispondi,
cissà, che el to dolor no 'l g'abia fine...
Ci è sta a piantarte sta mucia de spine?
– Guàrdelo là... Con tuto el so talento,
me maraveio che così el discora:
le rose g'ha le spine par de fora,
i omeni ghe ià tute de drento...
― Guàrdelo là con tuto el so talento!
– Pianta de rosa, se te compro un vaso
color celeste e pien de tera bona;
se te meto a servir la me parona,
che la te tegnarà drento el bombaso;
se te cavo su tute le radise,
pianta de rosa e se te porto via,
cosa me deto a mi de sensaria?
– Eco, de mio no g’ho che quatro strasse,
ma se l'è sto bon posto che el me dise,
ghe darò el primo bócolo che nasse!
– Rosa de muro, rosa rampeghina,
gamba sutila da le çento foie,
no podaressi no qualche matina,
traverso la ferià de la cusina,
spiar da ela cosa l'è che boie,
cosa ghe boie soto la bustina?
― Ghe boie un coresin da inamorada...
Rosa, rosina, roseta, rosada!
- Note