La passe del brol
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← La sioreta persa nel bosco | Edission e fonte ▼ | A spasso co le rose → |
Graspi1 de ua moscata
che fa vegnèr le voie,
se gode tra le foie
el caldo de l'istà.
Soto, ne l'erba fresca,
unite e disunite,
s-ciapi2 de margarite
spiansa3 de stele el prà.
El sol, traverso i rami,
fa de i ricami in tera...
Scominçia a vegner sera...
LA PUTINA.
Mama, se in sto momento
un angelo vegnesse
e a furia de caresse
el me portasse via?...
LA MAMA.
To mama piansaria!
– Trema el sol fra le piante;
'na campana distante
segna l'Ave Maria.
LA PUTINA.
Mama, se in sto momento
che son quà bela e sana,
un lovo4 da la tana
me rosegasse el cor?
LA MAMA.
Pensando al to dolor
la mama moriria.
― La solita campana
segna l'Ave Maria
el sol traverso i rami,
par mancansa de lana
finisse i so ricami.
E le rane in cisterna,
che no pol più star site,
prinçipia a tacar lite
e crà...
e crà...
e crà...
E i slusini5 brusando
a lite,
a lite,
a lite,6
spiansa de stele el pra...
È vegnuda la sera;
la luna in meso a i rami,
fa de i ricami in tera!
- Note