A un Ministro
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← La nomina d'un Deputato | Edission e fonte ▼ | La giustizia moderna → |
No far le mignognole
Ministro per dio....
Via, salva per altri
La grazia el to brio....
No amo de vederte
In quei to momenti
Che co' arte subdola
La patria spaventi
Ormai la retorica
Del noto to pugno
No fa più paura
Insieme al to sgrugno.
Qualunque sia ostacolo
Ti meti, ti trovi
Qualunque sia genere
D'astuzia ti provi
Ormai da sto popolo
La xe conosùa
El sa che ti brami
El sangue ch'el spùa.
Ti dixi ch'el credito
Ghe manca al paese,
E ti spudorato
Ti fa nove spese!
Ministro impossibile,
Vergogna vergogna,
Ti vol ch'el paese
Deventa carogna!
T'inventi combricole,
Ti vol che i cospira
Perchè li sacrifichi
Fin dove i respira
Ti susciti scandoli
E tuto per bezzi,
Chè nò i pol pagarte
Chè i xe tuti a pezzi
Sti boni e carissimi
Dei to patrioti
Che i fa sacrifizi
Per vualtri che roti
Dal vizio continuo
De andar per le banche
A scoder milioni
No minga palanche!
Per spender po' a l'estero
Milioni a palae
E po' per l'esercito
De nove velae.
Sì... spese credemelo
Inutili afato
Che ga sto paese
Deboto desfato.
No far le mignognole
Ministro per dio,
Via salva per altri
La grazia el to brio.
Ministro impossibile,
Vergogna vergogna,
Ti vol ch'el paese
Deventa carogna.