La nomina d'un Deputato
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← La Libertà | Edission e fonte ▼ | A un Ministro → |
Quanto se stolidi
Che ve afanè
E infaticabili
Ve adoparè.
Sieù pur monarchici
O liberali,
O sanfedisti
Rossi o pur zali,
A mi credemelo
Che so italian
Sol basta esser
Col cuor in man.
Sdegno de vederve
Soto un aspeto
Che a un patriota
Fa sol dispeto,
Un nome celebre
Robà per fama
Fin el cervelo
Tuto ve infiama
E via slanzandove
Tuti se in moto
Rischio pericolo
De aver sangioto.
Imparegiabile
Xe el candidato,
Omo de merito
Che molto à fato,
Se volè vederlo
Proprio in azion
Andè a sentir
La soa orazion
Che ancùo in bel termine
De conferenza
La prende el nome
Sta soa eloquenza!....
Novo decemviro,
Senza mistero,
Le cose in tavola
Mete sincero
St'omo giustissimo
Vedrè che inferno
Lu ve ne dixe
De sto governo.
O pur la regola
El ve dirà
Come se domina
Regni e cità,
O pur co' languida
Sacra parola
Del papa e Cristo
El farà scuola.
La funestissima
Iniqua stela
Che ne perseguita
Sicuro el svela,
E co' le ciacole
Salva i mortali
Dal precipizio,
Da cento mali.
Le virtù deboli,
La schiava vita
Dal vituperio
D'una sconfita.
El vien solecito
A solevar
Perchè benissimo
Tuto el sa far.
Nol xe volubile
Ne la soa idea
Che in virga ferea
El porta a mea
El sa prometerve
E mari e monti
Perchè bravissimo
El xe de conti
Se lo se nomina
Per deputato
A mi credemelo
El xe ben fato.
El scopre el calcolo.
De l'intrigante,
El sa introdurse,
El xe zelante,
Le banche facili
Che fa emission
Overo prestiti
Anca in scondon,
Da lu in gran orido
La xe conceto;
Questo credemelo
Xe un gran ometo.
Elo a la gloria
Ve condurà,
Dal precipizio
Ve salvarà
La funestissima
Iniqua stela
Che ne perseguita
Ne la scarsela
Co' una provida
Novela eclisse
Con Giosuetico
Modo el finisse.
Sì de la gloria
Lo iragerà
El sol più vivido
Se oscurerà
Quanto sè stolidi
Che ve afanè
E infaticabili
Vè adoperè!
No capi stupidi
Che l'è un mestier
Che ancuo se esercita
Co' gran piaser!
Amor de patria
Messo è in canton....
E ti te strussi
Popol zucon?....