Al Senatore Giovanni Faldella (Augurio Natalizio)
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← A la prima piera del Campanil de Samarco | Edission e fonte ▼ | Peocio refà → |
Coi oci del me cuor, co la mia mente
che svola ardìa co slanzo sempre egual,
zirando per Saluggia idealmente,
vedo 'na bela casa patriarcal.
E più che posso me ghe fico arente,
senza pensar se fassa ben o mal,
godendo quela pase che se sente
da là sortir, 'na pase çelestial.
E senza domandarghe a chichessia
el parmesso d'entrar par un momento,
fidando de la cara cortesia
dei paroni de casa, vado drento
de spron batuo, me tiro adrio 'l cançelo
co rispeto cavandome 'l capelo.
Ma fati pochi passi par l'intrada
come un orbo che in ziro va a taston,
eco, che come splendida vision,
'na bela vecia tuta inarzentada
me vien davanti alegra, e co un bel ton
de vose e co modestia no studiada,
la me dise: Mio fio? e de brivada
l'andava za a ciamarlo de scampon.
— La se ferma, signora, ghe go dito,
e no la me lo staga a desturbar:
Se lu xe là che pensa, a bon dirito,
Col so saver, coi studi a iluminar
de patrio amor certe tardive teste,
mi voleva augurarghe bone feste.
E invidiando la pase de quel logo
e de Faldella el patrio ardente fogo
e dei so studi el plauso universal
e la so casa tanto patriarcal;
amirando e disendo in t'una recia
un mar de bele robe a quela vecia
come, contento, una veceta un dì
godeva a cocolarmela anca mi,
coi oci del me cuor, co la mia mente
che viagia dapartuto, bravamente
go fato da Saluggia un fronte indrio,
contento de aver fato el dover mio.