Amor no corisposto
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Insogno e Cabola | Edission e fonte ▼ | La Note del Redentor → |
― «Liseta, quando so' viçin a ti,
Me sento el cuor far tich e toch in sen...»
― «(Che sia l'orologio)?» ― «E po' me vien
Come n'afano...» ― «(Oh povarin)!» ― «Ah, sì;
Lisa, no farme più penar cussì...»
«(Senti sto merlo come el canta ben)!»
― «Gò el cuor de amaro...» ― «(Fernet Branca)?» ― «...Pien.»
«(E vodo el tacuin).» ― «Ah?» ― «Sì, anca mi...»
― «E alora, ciò, perchè no contentarme?
Gabi pietà, me buto a i to zenoci!...»
― «(Auf, co secada)!» - «Più penar no farme!
Cara, co ti me vardi co quei dò oci,
Me sento tuto el sangue sbisegarme;
Cossa che sia?» - «Ti gavarà i peoci!...»