Ancora l'onomastico
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Musica | Edission e fonte ▼ | Bellis perennis (Linn.) → |
.jpg)
Quam admirabile est nomen tuum in universa terra!
Psal. VIII, 10.
ΤANTE grazie, putèi! Capisso tropo
Tuto el bon cor del vostro complimento
E lo cognosso manoprato a scopo
Dirò, de lieto evento.
Però, scusè se ancuo son manco alegro
De l'altra volta che se semo visti...
Ma che massoneria! Son cussì negro
Per via dei democristi!
Proprio de lori! Tuta zente mata
Che, ciacolando massa e senza sugo,
El vicario de Cristo i me lo trata
Pezo de un pampalugo.
I domanda una Chiesa a la moderna,
Interpreta el Vangel come ghe par,
Revede el pelo a la salute eterna
E i se vol maridar.
I preti maridarse? Anime sante,
Chi xe quel toco d'aseno che crede
Che una mugèr potabile e galante
Sia d'agiuto a la fede?
Pensè, se dopo che go dito messa
E predicà la castità a le stele,
Me trovasse in famegia una Papessa
Che fosse... una de quele?
E se, a vergogna de le Sante Ciave,
Mia fia, dirò, levasse la gualdrapa...
E po' pensè che diàscane sarave
La suocera del Papa!
Voràveli ch'el Papa se sentasse
Dentro Aragno a fumar la zigarèta?
Voravèli ch'el Papa spaseggiasse
Per Roma in biziclèta?
Ma mi, se ben che per bontà de Dio
So' un povaro cristian nato a Riese,
Ghe piopo un monitorio per da drio
A l'uso giapponese.
I xe fioi de le mie vissare istesse,
Ma quando che i putèi ghe ne fa trope,
Se ghe fa molar zoso le braghesse
E i se castiga in pope.
Cossa credeli mai? Mi sarò bon,
Ma no tre volte, come se suol dir!
Che democristi! Mi son el paron
E i me deve obedir.
Per questo dunque no i se fazza caso
Se son più scuro che ne' miei ritrati,
Ma benedisso lori, el so Travaso
E tutti i so abonati.