Bon Capo d'ano
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Sermon de Nadal | Edission e fonte ▼ | Epifania → |
.jpg)
Ecce sto ad ostium et pulso.
Apoc. III, 20.
MANCO mal, bona zente, manco mal
Che st'ano berechìn xe andà in malora,
Anzi, putei, mi no vedeva l'ora,
Tanto el giera diabolico e infernal.
Guere, peste, boleta universal,
La Franza separà che me adolora,
Spese che cresse, bèzi che svapora,
Gnente timor de Dio, gnente moral.
Sempre miserie nove e novi guai
E l'unica risorsa che riman
Xe nel Governo de sti liberai,
Che se no fosse el popolo italian
A cocolarse le muneghe e i frai,
Faliressimo prima de doman.
E mi son sempre qua senz'aria è moto
Spetando el zorno de poder scampar,
Che me giera provà per teramoto
Ma, de dia, no ghè stà gnente da far!
Tuti i m'ha saltà adosso, che deboto
I m'ha abuo, con respeto, da magnar,
Tanto che gò desfato el mio fagoto
E son remasto in gabia a tribolar.
E son mi che comanda! Andemo! via!
Questa lori i ghe dise religion,
Ma mi ghe digo sporca tiranìa,
Che se tornasse Cristo e che Neron
Lo condannasse, no i me lassarla
Gnanca andarghe a portar l'asoluzion!
Aimeh! Questo che qua no xe sogiorno
Per chi del sol se gode e se inamora
E che le pompe no le stima un corno
Se un po' de libertà no lo ristora!
Zendarmi e guardie i me sta sempre atorno,
Ma la speranza no xe morta ancora
Che ne l'ano che vien se trova el zorno
De spalancar ste porte e vegnir fora!
Ma come? Forse a piè come i fa tanti,
O sentà in timonela a spassizar,
O, Dio no vogia, con le scarpe avanti?
Basta, no stemo tanto a ciacolar
E Dio ve benedissa tuti quanti
Caso che nol gavesse altro da far.